Алай йисан 4-майдиз акъатай “Лезги газетдин” 18-нумрада журналист Нариман Ибрагьимован “Лезги мани — дерди мани” кьил ганвай макъала чапнава. Ана авторди къенин юкъуз лезги музыкадин искусство авай гьалдикай лап гегьеншдаказ суьгьбетнава.
Макъаладин “Гьар сад — чеб- чпиз” кьили зи фикир вичел желбна. Ана авторди чи тамашачийри манидаррин репертуарда авай манийрилай наразивалзавайдакай, манидаррини композиторри къуьн-къуьневаз кIвалах тийизвайдакай ва гьар сад чеб-чпиз авайдакай кхьизва. ГьикI жедач кьван абур чеб-чпиз, эгер садаз муькуьдакай хабар авачиз хьайила? Хайи газетдин чинриз, юбилеяр хьайи вахтунда, бажарагълу композиторрикай гегьенш макъалаяр акъатзава, амма Н.Ибрагьимова вичин макъалада тIварар кьунвай композиторрикай Омар Аюбов, Керимхан Бабаев, Фетуллагь Рагьимханов, Гьасанагъа Мурсалов, Падишагь Киберов ва тIварар кьунвайбурун сиягьда авачир Насир Шагьмурадов, Халил Халилов, Мавлудин Хаиров, Маина Абдулмуталибова хьтин композиторар халкьдиз хъсандиз раиж туш.
2006-йисуз мектеб акьалтIарайдалай кьулухъ зун Дербент шегьердин музыкадин училищедик экечIна. Зун аник экечIайдалай инихъ саки 12 йис алатнава (за ана 2006-2010-йисара кIелнай). И 12 йисан вахтунда жува кIелай илимрилай гъейри за гзаф газетар, ктабар, журналар тупIалай авуна. Санайни заз винидихъ тIварар кьунвай композиторрикай са делилни жагъанач. “Лезги газетдани” абурукай кьериз-цIаруз кхьенва.
Къе чахъ гзаф манидарар ава. Абуру тамамарзавай манийрихъ яб акалайла малум жезва хьи, композиторарни, манидарарни, шаирарни гьа чеб я. Къенин манидарри куьгьне маниярни саймишзавач. Абур “муьгьуьббатдин” есирда гьатнава. Эгер икI давам жез хьайитIа, чи милли музыкадин дережа лап агъуз аватда. Ахьтин кIвалахдиз рехъ гана виже къведач. АкI тахьун патал сегьнедиз чи бажарагълу манидарар тир Р.Гьажиевади, Д.Рагьимовади, А.Камилова, Р.Сафарова, Гь.Мансурова, Р.Агъабалаева чпин девирда тамамарай жавагьирар хкана кIанда. Эгер куьгьне манияр сегьнедиз ахкъуд хъувуртIа, чи милли искусство акваз-акваз виниз хкаж хъжеда.
Эдуард Ашурагъаев,
муаллим
