Мукьвара зун Дербент шегьерда яшамиш жезвай гъетягъви, Ватандин ЧIехи дяведин иштиракчи, полковник Гьажимуслимов Гьажимуслимаз мугьман хьана. Малум хьайивал, Гьажимуслим бубадин уьмуьрда тебрикдай мад са вакъиа ава — 1-июндиз ветерандин 95 йис тамам жеда.
Сулейман-Стальский райондин чIехи хуьрерикай сад тир Гъетягърин хуьряй Ватан душмандикай хуьз гуьгьуьллувилелди 89 кас фена. Абурукай 68 касдиз элкъвена хайи ватандиз хтун кьисмет хьанач. Гьар ватандашди вичин уьмуьрда гьикьван халкьдиз, Ватандиз намуслувилелди къуллугъайтIа, гьакьван адаз гьуьрмет жеда. Ихьтин инсанпересвилин дережаяр хуьзвайбурукай сад Гьажимуслимов Гьажимуслим я.
За адавай вичин уьмуьрдикай, дяведин къизгъин вахтарикай суьгьбет авун тIалабна.
Гь.Гьажимуслимов 1923-йисан 1-июндиз виликан Кьасумхуьруьн райондин Уллу-Гъетягърин хуьре лежбердин хизанда дидедиз хьана. Аял дидедин бедендик кумаз, бедбахтвилин дуьшуьшдик акатна адан дах Гьажимуслим рагьметдиз фена. Хцин мейит акур буба Гьажибутайни рикI акъвазна, кьена. Хва кьена лагьай ван галукьай диде Лейли, къавалай аватна, юкь хана, месе гьатна. КIвалин юкьвал кьве мейит хьана.
Кьейи Гьажимуслиман тIвар дуьньядиз кьве вацралай атай адан хцел эхцигна. Гьажимуслиман пуд варз хьайила, адан дидени вичин буба-дидеди хутахна. Дидедикайни бубадикай магьрум хьайи Гьажимуслим, юкь хана патахъ хьанвай бадедални гъуьлуьк квай адан руш Салиятал аватна. Аял чIавалай акур вири четинвилериз дурум гана, 1938-йисуз Гъетягъа 7-класс куьтягьна, ам Дербентдин педучилищедик экечIна.
1939-йисуз кIелун давамарун патал 150 манат пул гудай мумкинвал тахьай жегьил училищедай экъечIна, Азербайжанда яшамиш жезвай эмедин патав фена. Ана фабрично-заводской школа куьтягьна, слесарь-токарвилин пеше къачуна, нафтIадин мяденра кIвалахиз башламишна.
1942-йисан майдин вацра жегьил армиядин жергейриз тухвана. Тифлис шегьерда радиотелеграфистрин курсар куьтягьай аскер Кеферпатан Кавказдин фронтдиз ракъурна. А вахтунда душмандиз дагъларин гирвейрал гьужумна, Сухуми ва маса шегьерар кьуна, анай Бакудин нафтIадин мяденар гъилик авунин фикир авай.
Немсер Кавказдай чукурайла, Гьажимуслима къуллугъзавай полк Гагра шегьердин патарив акъудна, дивизиядин штаб Азербайжанда акъвазарна. Гь. Гьажимуслимова штабдихъ галаз алакъа хуьзвай. Ихьтин агалкьунрай адаз дивизиядин командирди кьве гьафтеда кIвализ хъфидай вахт ганай.
1943-йисан эхиррай немсерин кьушунри кьулухъ чIугваз башламишна. Гьажимуслим авай подразделение 133-кьилдин стрелковый бригададиз рахкурнай, гуьгъуьнлай алакъадин кьилдин 628-батальондик кухтур адан батальон Эрменистандиз, Туьркиядин сергьятдал алай Аракс вацIун къваларив рекье туна. Гь.Гьажимуслимовакай радиовзводдин командир хьанай.
1948-йисан мартдиз Гьажимуслим хуьруьз хтана, заочно Дербентдин педучилищеда кIелун давамарна, гьа са вахтунда Агъа-Хъартасрин мектебда муаллимвални авуна.
1950-1952-йисара Украинадин Львов шегьерда КГБ-дин кьве йисан курсар куьтягьна, Дагъустандиз хтана, КГБ-дин органра 25 йисуз кIвалахна. 1960-йисуз ада ДГУ-дин тарихдин факультетни акьалтIарна.
1976-йисуз отставкадиз фейила, 10 йисуз Дербентдин горторгдин директордин заместителвиле кIвалахна. Гуьгъуьнлай ада газ квай чехирар хкуддай заводда кадрийрин рекьяй кIвалахна.
Гьажимуслим Гьажимуслимован зегьметдиз гьукуматди еке къимет гана. Ам Ватандин дяведин 1 дережадин ордендин, цIудралди медалрин, хейлин грамотайрин сагьиб я.
Адаз уьмуьрдин юлдаш Майтаба 4 рушни са хва багъишна. Гьажимуслимни Майтаб кьведни дявединни зегьметдин ветеранар я. Абурун веледри гьарда чпин пешедай Ватандиз къуллугъзава. Гъетягъвийри ахьтин рухвайрал дамахзава.
Чна Гь.Гьажимуслимоваз Гъалибвилин 73 йис ва уьмуьрдин 95 йисан юбилей рикIин сидкьидай мубаракзава. Адахъ чандин сагъвал хьун чи мурад я.
Вадим Жамалдинов
