Къе Курхуьруьн гьи магьледиз, гьи кIвализ фейитIани, агьалийрин гуьгьуьл хкаж хьана, инсанрик шадвал кваз аквада. Себебни ам я хьи, абуруз чеб яшамиш жезвай и зурба хуьр, Куьре Меликан хайи Ватан къвердавай еке, гуьрчег, авадан, инсанар чеб чпихъ галаз къвердавай хатурлу жезвайди аквазва. Хуьруьн тарихдал чун акъваздач. Адакай рахунар, кхьинар гзаф хьанва, тарихдин ктабни и цIарарин авторди акъуднава.
Амма эхиримжи вахтара, яни мукьва жезвай ЦIийи йисан вилик арадал къвезвай бязи цIийивилерикай талгьана жедач. Кар анал ала хьи, гьар са хуьруьн аваданвал адахъ авай рекьери къалурда. Гьелбетда, рекьер, иллаки хуьруьн къенепата авайбур, агьалийри чпи михьивал, къайда аваз хуьн адетдиз элкъуьрна кIанда. Чина и кар, санлай къачурла, писзавач. Хуьре вири 25 рехъ ава. Абурукай 5 кьилинбур я. Са шумуд куьче, бязи куьчейрин са кьадар паярани, къир цана, безетмишнава. Хуьруьн кьил Р.Гьажиалиева анра къайда-низам хуьнал гуьзчивалзава, лазим атай чкадал туьнбуьгьни ийизва, меслятарни гузва.
Агьалийрик шадвал кутазвай са кар мадни ава: хуьруьн юкьвай фенвай В.И.Ленинан тIварунихъ галай куьче кьилинбурукай сад я лагьайтIани жеда. Ана къирни сифтебурукай яз цайиди тир. Эхиримжи вахтара и куьчедин бязи чкаяр чIур хьанвай, гъвечIи лекъвер арадал атанвай. Ингье исятда и нукьсанар арадай акъудзава, виликамаз лазим тир гьазурвилер акуна, ана мад къир цазва.
Важиблу и кардал Дербентдай атанвай “Маяк” карханадин пешекарар машгъул хьанва. Рабочияр ва техника ина бес кьадарда ава. Мастер Гьайдаров Гьафиса, рабочияр тир Исрафилов Багьадина, Къурбанов Гьасана, Шерифов Насиба, варданагар гвай Гебеков Расима, Рамазанов Мегьтиди ва масабуру зарбачивилелди зегьмет чIугвазва.
Кьве версинилай хьиз яргъивал алай и рекье къир са куьруь вахтунда цана куьтягьдайвал я. И кардал райондин ва хуьруьн администрацийрин гуьзчивал ала.
Райсудин Набиев,
пенсияда авай муаллим, зегьметдин ветеран
