Дагъустандин Кьил Сергей Меликова Россиядин Игит Энвер Набиеваз “Дагъустан Республикадин вилик лайихлувилерай” орден гана. Шабагь гунин гьакъиндай региондин Кьили вичин тelegram-каналда хабар гана.
“Къе зун чи ватанэгьли, Россиядин Игит Энвер Набиевахъ галаз хъсан себеб аваз гуьруьшмиш хьана. Адаз “Дагъустан Республикадин вилик лайихлувилерай” орден гана. Энверан жуьрэтлувилерикай виликрайни лагьанай. Махсус серенжемдин сифте йикъарилай ана иштирак авуналди, ам Россиядин гьар са аскердин уьмуьр патал женгина хьана ва душмандиз инсафнач. Энверахъ лап хъсан хизан — диде-буба, уьмуьрдин юлдаш ава. Абуру тереф хуьналди, адаз лап четин макъамра къуватар гана. Энверахъ лап хъсан аялар — Айна ва Амир ава. Абуру чпин бубадал дамахзава.
Энвер, ви мягькем итимвилин хесетрай ва лайихлу къуллугъдай мад сеферда ваз чухсагъул. Инанмиш я, вахъ мадни еке агалкьунар жеда”, — кхьенва Дагъустандин Кьили.
Каспийскдин агьали майор Энвер Набиева Россиядин Игитдин гъед Украинада кьиле физвай махсус серенжемдин вахтунда къалурай кьегьалвиляй къачуна. РикIел хкин, адан ери-бине Ахцегь райондин Чеперин хуьр я.
«Лезги газет»
