7-ноябрдиз Дагъустан Республикадин Гьукуматдин Председатель Абдулмуслим Абдулмуслимова, къецепатахъ галаз алакъалу бязи себебар фикирда кьуналди, республикадин экономика дурумлудаказ виликди тухун таъминарунин рекьяй Оперативный штабдин заседание кьиле тухвана, хабар гузва РД-дин Гьукуматдин пресс-къуллугъди.
Вилик эцигнавай месэлайрикай сад регионда къуллугъар рекъемламишунин кIвалах кьиле тухун тир. А.Абдулмуслимова къейд авурвал, чирвилер гунин гьерекатда чеб галачиз алай аямдин жемият виликди фин мумкин тушир рекъемрин технологияр активнидаказ ишлемишиз башламишна кIанда.
“Къенин юкъуз абуру бизнес виликди тухунин, талукь тир делилрин продуктар ва къуллугъар арадал гъунин, халкьдин майишатдин кьилди къачур хилер еримлу авунин ва, санлай къачурла, экономика виликди тухунин гьерекат йигинарун таъминарунин карда кьилин роль къугъвазва”, — къейдна ада.
Премьер-министрди гьакIни рикIел хкайвал, “Рекъемрин экономика” милли проектдин сергьятра аваз агьалийрин яшайиш патал важиблу къуллугъар электронный къайдада агакьарунин хел инанмишвилелди вилик физва. Ида лагьайтIа, и къуллугърикай менфят къачунин кар акьалтIай асантди ва къулайди ийизва — и ва я маса къуллугъ кIвалин къеняй экъечI тавуна къачуз жезва.
“Республикадин рекъемрин министерстводи, муниципальный тешкилатрихъ галаз санал агьалийрин арада ихьтин мумкинвилер машгьур авунин кIвалах кьиле тухун лазим я”, — лагьана премьер-министрди.
Госкъуллугърин сад тир порталдай яшайиш патал важиблу къуллугъар къачузвай агьалийрин кьадардикай РД-дин рекъемрин рекьяй виликди финин министр Юрий Гьамзатова суьгьбетна. Адан гафаралди, регионда электронный къуллугъар исполнительный властдин 19 органди ва муниципальный 52 тешкилатди тамамарзавай. Алай вахтунда дагъустанвийривай Госкъуллугърин порталдин куьмекдалди 89 къуллугъдикай менфят къачуз жезва, абурукай 84 гзаф кьадар инсанрин яшайиш патал важиблубурук (МСЗУ) акатзава ва гзафбуру ишлемишзава.
“Яшайиш патал важиблу къуллугърикай электронный къайдадикай гзаф агьалийри менфят къачун патал РД-дин зегьметдин ва яшайишдин рекьяй виликди финин, образованидин ва илимдин, гьакIни экономикадин ва мулкар виликди тухунин министерствойри идарадин хсуси делилрин системаяр ишлемишзава ва еримлу ийизва.
Алай вахтунда региондин “Государстводин идараяр рекъемламишун” проектдин вад уьлчмедикай (показатель) МСЗУ-дин рекьяй 4-дав агакьнава.
“МСЗУ электронный къайдада къачун патал арзаяр кхьизвай агьалийрин кьадар алай йис патал 30% яз тайинарнавай, алай вахтунда ам 19 процентдиз барабар я. И делилдив йисан эхирдалди агакь тавунин хаталувал ава”, — лагьана министрди.
Гуьгъуьнлай Ю.Гьамзатова яшайиш патал важиблу къуллугъар электронный къайдада гзаф кьадар агьалийри ишлемишун патал РД-дин рекъемрин рекьяй виликди финин министерстводи кьиле тухузвай кIвалахдикай лагьана.
«Лезги газет»
