Махсус серенжемдикай
8-ноябрдиз РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 331 самолет ва 170 вертолет, зенитный ракетайрин 387 комплекс, пилот галачиз лув гудай 2458 аппарат, 6421 танк ва дяведин маса машинар, РСЗО-дин 884 машин, артиллериядин ва маса 3562 яракь, военный махсус 7109 автомашин тергна.
Жемятдихъ галаз веревирдда
РФ-дин Президент Владимир Путина кIвалахдин рекьяй Твердин областдиз фейи вахтунда хиве кьурвал, ада россиявийрихъ галаз мобилизациядин сергьятра аваз военный къуллугъдал эвер ганвайбуруз куьмекар гунин месэла веревирдда. Идакай “Новости” РИА-ди хабар гузва.
Твердин областдин кьил И.Руденяди военный къуллугъдал эвер ганвайбуруз гузвай такьатрикайни Президентдиз ихтилатна. В.Путина и месэлайриз кьетIен фикир гузва.
“Фикирар чир хьун патал зунни инсанрихъ галаз гуьруьшмиш жеда, и жигьетдай ихтилатарда”, — лагьана уьлкведин регьберди.
Президентди тестикьарайвал, тамам тушир мобилизациядин сергьятра аваз эвер гайибурукай 80 агъзур кас военный махсус серенжем кьиле физвай зонада ава. Абурукай саки 50 агъзур касди женгинин гьерекатра иштиракзава.
Есирди ихтилатна
Яшайишдин къурулушриз цIай гун патал Киевдин гьукумдарри Россиядин пуд региондиз диверсантар гадарун фикирдиз къачунвай. “Новости” РИА-ди раижнавайвал, идакай есирвиле кьунвай Украинадин яракьлу кьушунрин къуллугъчи П.Ткачука ихтилатна.
Чи уьлкведин аскерри кьунвай украинви есирдин гафаралди, ихтилат Курскдин, Брянскдин ва Белгороддин областрикай физва.
“Макьсад Украинадин мулкарин мукьув гвай чкайриз Россиядин яржар алай военный техника гваз гьахьун тир”, — тестикьарна есирди.
Ада алава хъувурвал, Украинадин аскерриз Донбассда еке зиянар жезва.
Сирлу СМС
РФ-дин къецепатан разведкадин къуллугъдин директор С.Нарышкина малумарнавайвал, Британиядин виликан премьер-министр Л.Трасса США-дин госсекретарь Э.Блинкеназ ракъурай “вири кьилиз акъудна” гафар авай СМС-ди Россиядин гьукумдарриз ам “Северный поток” хъиткьинаруниз талукьди я лагьана фикирдай себебар ава. Идакай “Российская газета” телеграм-каналди хабар гузва.
Римлуяр нарази я
И йикъара Италиядин меркезда “Меслят хьунин рахунриз — эхь, яракьар ракъуруниз — ваъ!” лишандик кваз агъзурралди агьалийрин иштираквал авай серенжем кьиле фена. Идакай “Российская газета” телеграм-каналди хабар гузва.
Къейдзавайвал, Римдин агьалияр Украинадиз яракьар ракъуруниз кIевелай акси я. Наразивал малумарзавайбурун серенжемда 100 агъзур кьван ксари иштиракна. Гьа ихьтин серенжемар Италиядин 100-лай гзаф маса шегьеррани тешкилна.
Куьмек гун давамарзава
США-дин конгрессди Украинадиз куьмек гунин кар давамарунилай разивал къалурнава. “Новости” РИА-ди хабар гузвайвал, идакай президентдин милли хатасузвилин рекьяй меслятчи Д.Салливана ихтилатна.
Ада къейдна хьи, Лацу кIвали ганвай къиметдал асаслу яз, Украинадиз гьам республикавийрин, гьамни демократрин патай куьмек гунин терефдарар ава.
Лув гудай машин
Китайдин “XPeng” тешкилатди туькIуьрнавай лув гудай машин синагъдай акъуднавай видео интернетдин майданра пайда хьанва. Идакай “NewAtlas” чешмеди хабар гана.
Муьжуьд ротор алай улакь цавуз хкажна ва ада лув гунин тегьер къалурна. Синагъдай акъудунин серенжемдин вахтунда тешкилатдин инженерри машиндивай лув гуз ва хъуьтуьлдаказ чилел ахцукьиз жезвайди къалурна. Пешекарри двигателрикай сад къайдадикай хкатай дуьшуьшда кIвалахдай тегьерни ахтармишна.
Къейдзавайвал, автомобилдин заланвал 1936 килограммдикай ибарат я. Адан кузов адетдин автомобилдинди я. Тешкилатдин векилри автомобилдивай гьикьван яргъаз лув гуз жедатIа ва адахъ маса гьихьтин мумкинвилер аватIа ихтилатнавач.
«Лезги газет»
