Фенек
Шикилдай аквазвайди къумлухра яшамиш жезвай гъвечIи сикI я. Бедендив гекъигайла, и сикIрен япар гзаф еке я. Фенек араб чIалан са нугъатдин “фанак” (сикI) гафуникай арадиз атанва.
Фенек виридалайни гъвечIи сикI я. Ам кIвалин кацелайни гъвечIи я. Бедендин яргъивилел 30-40 сантиметр ала, тумунин яргъивилел — 30 сантиметр. Заланвал 1,5 килограмм кьван жеда.
Яргъи япари (15 сантиметр) фенекдиз неинки хъсандиз ван атунин, гьакIни зегьем вахтунда бедендиз гар гунин карда куьмекзава. Хамуналлай чIарар винелай расу ва я самун рангунинбур жеда, кIаникай — лацу рангунинбур.
Фенекар Кеферпатан Америкада, Сахарада, Мароккода, Синайский, Аравийский полуостровра ва масанра яшамиш жезва.
Къумлухра фенекар яшамиш жедай тIеквенрихъ чинебан рекьер, экъечIдай чкаяр ава. И сикIер йифен уьмуьр кьиле тухузвайбур я. Недай затI жагъурдай ва далдаламиш жедай мумкинвал жезвайвиляй фенекар къумлухрин са акьван къалин тушир кул-кусрин, легъерин патарив яшамиш жезва.
Фенекар кьилди-кьилди ваъ, дестейралди яшамиш жедай гьайванар я. Гьар са десте тахминан 10 фенекдикай ибарат жеда. Амма гъуьрч абуру текдиз ийида. ТIебиатда абуру къушарин какаяр, къушар чеб, кьифер, гьашаратар, лешер, гьатта набататарни незва. И сикIеривай гзаф вахтунда яд хъун тавуна дурум гуз жеда. ЯкIук, майвайрик ва пешерик квай кьеж бес жезва. Фенекдин мад са кьетIенвал ам я хьи, и гъвечIи вагьшидилай 70 сантиметрдин кьакьандиз хкадариз алакьзава.
«Лезги газет»
