Подписка-2023

2007-йисалай эгечIна, за гьар ислен юкъуз Кьасумхуьруьн телевиденидай СтIал Сулейманан райондин администрациядин сайтдин, “Лезги газет” ва “Куьре­дин хабарар” газетрин обзор гузва. Ам агьалийри хушвилелди кьабулзава, ида зи ашкъи-гьевесни хкажзава.

Ингье 2023-йис патал газетарни журналар кхьиз гатIунна­ва. За гьар ислен юкъуз чкадин телевиденидай гузвай обзорни ихьтин келимайралди акьалтIар­зава: “Играми тир стхаярни вахар! Ша, чна сифте нубатда республикада жуван хайи чIалал акъатзавай жемиятдинни сиясатдин “Лезги газет” ва райондин печатдин орган тир “Куьредин хабарар” газетар подписка ийин!”.

Зи фикирдалди, “Лезги газет” лезги гьар са хизанда хьун лазим я. Алай вахтунда газетдин тираж 6352 экземпляр я. Им лап тIимил я, гьич тахьайтIа, чи милли газетдин тираж 10000-далай тIимил хьун лазим туш.

1973-йисалай инихъ за вичихъ галаз сих алакъа хуьзвай “Лезги газет” заз багьа я, лугьудайвал, ам зи фуни я, къафунни. Гьавиляй за гьар йисуз агьалийрин арада газет подписка авунин патахъай таблигъатни тухузва.

Багъри газет кхьиник яратмишдай интеллигенциядин векилри, муаллимри, медениятдин пешекарри, жемятдин векилри, гьар са касди вичин пай кутун лазим я.

Хазран Кьасумов