Ислендиз РД-дин Гьукуматдин Председатель Абдулмуслим Абдулмуслимован регьбервилик кваз сифтегьан классра класс-комплектар туькIуьруниз талукь месэлаяр веревирдна. Къейд ийин, класс-комплект 2 ва я адалайни гзаф классра чирвилер къачузвайбурукай ибарат, гьа са муаллимди тарсар гузвай группа яз гьисабзава.
РД-дин образованидин ва илимдин министр Я.Бучаева малумарайвал, кIелунин 2022-2023-йисан 1-сентябрдиз муниципальный мектебра чирвилер къачузвайбурун умуми кьадар 442 агъзурни 630 ученикдикай ва 24074 класс-комплектдикай ибарат тир.
Совещанидал министрди малумарай сифтегьан мектебдин класс-комплектрин кьадар хуьнин ва 5-11-классриз талукь яз класс-комплектар сад авунин мумкинвилериз килигна. Ида дагълух хуьрерин мектебра кIвалахдай 87 чка (104 ставка) хуьдай мумкинвал гуда.
Иштиракчийрин фикиррихъ яб акалуналди, А.Абдулмуслимова къейдна хьи, мектебра кIвалахдин чкаяр жезмай кьван хуьнин рекьер жагъурна кIанда. Аялри чпин хайи хуьрера, поселокра алай аямдин шартIара кIелун, гьа са вахтунда шегьердин аялрилай кьулухъ галамукь тийидай хьтин хъсан еридин чирвилер къачун герек я.
Совещанидин нетижаяр кьадайла, А.Абдулмуслимова РД-дин образованидин ва илимдин, финансрин министерствойрал рабочий десте арадал гъунин ва 10 йикъан къене класс-комплектар, са къайдада туна туькIуьрунин жигьетдай гьакъикъи теклифар гунин месэла тапшурмишна.
М.Мегьдиев
