РФ-дин Президент Владимир Путина уьлкведин гьукуматдиз Дагъустан Республикадин исполнительный гьукумдин органрихъ галаз санал алай йисан 1-декабрдалди Каспийдин “Къаякент” курортдин ва Вирироссиядин аялрин “Дагъустан” центрадин проектрин мастер-планар гьазурдайди ва и месэлайрин гьакъиндай жавабдарди тайинарун буйругънава. ТАСС-ди хабар гузвайвал, и малумат Кремлдин официальный сайтда чапнава.
Президентдин тапшуругъ кьилиз акъудунин гьакъиндай жавабдарвал РФ-дин Гьукуматдин Председатель Михаил Мишустинан ва РД-дин Кьил Сергей Меликован хиве тунва.
Мукьвара Дагъустандиз РФ-дин экономикадин рекьяй вилик финин министр Максим Решетников мугьман хьайила, ам винидихъ тIвар кьунвай проектриз талукь делилрихъ галаз мукьувай таниш хьана ва ада кьве проектдизни виниз тир къимет гана.
РикIел хкин, РФ-дин Госсоветдин президиумдин алай йисан 6-сентябрдиз кьиле фейи заседанидал Владимир Путина Каспий гьуьлуьн къерехда “Къаякент” курортдал чан хкунин игьтияж авайдакай лагьанай.
«Лезги газет»
