РФ-дин Игит Энвер Набиеваз меценатар тир Палчаевринни
Пашаеврин хизанрин патай 2 миллион манатдин кьадарда аваз пулдин пишкеш гана
Гьар са девирдихъ вичин игитар ава — хайи Ватан, халкь кIевевай чIавуз, чандилайни гъил къачуна, адан таъсиб хуьзвай, гъиле яракь аваз женгиниз къарагъзавай кьегьал рухваярни рушар! Халкьдин уьмуьрда абуру кьетIен гел тазва, тарихдин цIийи чинар кхьизва, чпин чешнедалди инсанрик руьгь кутазва. Ахьтинбурун арада 23-октябрдиз Ахцегь районда шадвилин гьалара къаршиламишай лезги халкьдин кьегьал хва, Россиядин Игит Энвер Набиевни ава.
Пакаман сятдин 9-даз Энвер Набиевни адахъ галай юлдашар Ахцегь райондин часпардал муниципалитетдин администрациядин, сергьятар хуьзвай частунин, жемиятдин векилри шад гьалара къаршиламишна. Гуьгъуьнлай абур авай машинрин цIиргъ райондин центр галайвал рекье гьатна. Ватандин ЧIехи дяведа телеф хьайибуруз хкажнавай гуьмбетдал цуьквер эцигайдалай кьулухъ абуру вирида Ахцегьрин са куьче Энвер Набиеван имидин хва, рагьметлу генерал Набиев Рамзес Къудратовичан тIварунихъ ягъуниз талукьарнавай мярекатда иштиракна. Дяведин генерал Рамзес Набиеван уьмуьрдин ва женгинин рекьикай суьгьбетар авурдалай кьулухъ кьегьал хцин шикилни тIвар атIанвай мармардин кьул адан буба Къудрат Набиева, Энвер Набиева ва Ахцегь райадминистрациядин кьилин везифаяр вахтуналди тамамарзавай Вадим Агъасиева ачухзава.
Россиядин Игит къаршиламишунин мярекатрин асул пай Советрин Союздин Игит, лётчик Валентин Эмирован тIварунихъ галай ял ядай багъда кьиле фена.
Сятдин цIусад. Эмирован багъдин ачух зал-сегьне ватанпересвилин кьетIен суварин къайдада безетмишнава. Ина Игитдал вил алаз вишералди инсанар кIватI хьанва. Мярекат устадвилелди кьиле тухузвайбур тир Фикрет Башировани Эльвира Абдулкеримовади трибунадихъ Вадим Агъасиеваз теклифна.
— Ассаламу алейкум, гьуьрметлу ахцегьвияр, мугьманар! Къе чна Ватандин ЧIехи дяве гъалибвилелди бегьем хьайи 77 йисалай СССР-дин Игит, лётчик Валентин Эмирован багъда кьетIен гьуьрметдалди Россиядин танкист, Игит Энвер Набиев тебрикунин межлис кьиле тухун лишанлу кар я. За жуван, райондин кьил Осман Абдулкеримован ва вири районэгьлийрин патай и вакъиа квез рикIин сидкьидай мубаракзава, — лагьана ада. — Дамахдивди къейд ийин, гила Ахцегь районда 3 Игит ава: Валентин Эмиров, Гьазрет Алиев, Энвер Набиев! Игитвилин тIвар ва къизилдин гъед, гвардиядин майор, кьисайрик квай хьтин танкист Энвера, гьар садай гьакьван еке къимет гуниз лайихлу 3 кьегьалвал авуналди къазанмишнава…
Энвер Набиев хьтин кьегьал хва тербияламишунай заз адан диде-буба Альберт ва Суна Набиевриз сагърай лугьуз кIанзава. Къуй виридахъ чандин сагъвал, рикIин динжвал, Ватан хуьзвай кьегьал рухваярни сагъ-саламат хьурай, — акьалтIарна вичин ихтилат В.Агъасиева.
Гуьгъуьнлай сегьнедиз Энвер Набиев экъечIна:
— Вири халкь кIват хьана, зун икьван чIехи гьуьрметдивди къаршиламишунай, Ватан хуьнин зегьметдиз кьетIен къимет гунай райондин руководство, вири жемят гзаф кьадар сагърай! И йикъара Москвада авайлани, зун районэгьлийрин, лезгийрин чIехи диаспоради вини дережада аваз тебрикна. Лугьун хьи, Ахцегь районди ватанпересвилин межлисар кьиле тухунин, игитар къаршиламишунин жигьетдай вижевай чешне къалурна. Гъиле яракь аваз Ватан хуьнин женгеравай чи вири рухваяр игитар я. Къуй, я Аллагь, вири сагъ-саламатдиз хтана, багърийри гьа ихьтин шад гьалара къаршиламишдай йикъар акурай…, — алхишна Игитди.
Мярекатдин сергьятра аваз рахай Ахцегь райондин депутатрин Собранидин председатель Абдулкерим Палчаева Энвер Набиевав, тебрикдин хуш келимаяр лагьайдалай кьулухъ, “Ахцегь райондин гьуьрметлу агьали” тIварцIиз талукь шагьадатнамани меценатар тир Палчаевринни Пашаеврин хизанрин патай 2 миллион манатдин кьадарда аваз пулдин пишкеш вахкана.
Жемятдик ватанпересвилин руьгь кутазвай мани-макьамрин арада Игитдин тIварцIихъ тебрикдин гафар Ахцегьрин 1-нумрадин школадин муаллим, гьевескар шаир Жамиля Гьажиевади, гьа и школадин 11-классдин ученица Жанна Абдурагьмановади, райондин изобразительный искусствойрин школадин директор, Къарачаево-Черкесиядин лайихлу художник Мегьамедзериф Гьажиева (ада вичин ва школадин коллективдин патай рикIел аламукьдай ядигарар яз, Игитдиз ракьун гъвечIи танк-макет ва муаллимринни аялрин гъилин шикилрин альбом гана) ва маса юлдашри лагьана.
Райондин медениятдин макандин манидар Назлу Шагьбановади “Зи хайи Ватан”, РД-дин лайихлу артистар тир Зульфия Велиевади “Зи Кавказ”, Рубаба Къурбановади “Дагъвияр”, Саид Эскерханова “Игитриз аферин!”, райондин дишегьлийрин Советдин председатель Таира Мегьарамовади “Дуьнья” ва Фаргьад Гьашумова “Сагърай, лезгияр!” манияр лугьуналди, мярекат генани гурлу авуна.
Игитдин гьуьрметдай тешкилнавай шад межлис Ахцегьрин тарихдин музейда (ина, Ватандин ЧIехи дяведин залда, Украинада кьиле физвай махсус серенжемдин иштиракчийриз талукь экспозиция ачухнава) сиягьат авуналди ва жуьмя-мискIинда кьиле фейи диндин межлисда иштиракуналди давам хьана.
Дашдемир Шерифалиев
