Кьве йикъан вахтунда (19- 20-октябрдиз) РД-дин жегьилрин крарин рекьяй министерстводин патав гвай Республикадин жегьилрин центрада Рекъемрин рекьяй савадлувилин мярекат — школа — кьиле фида. Мярекат республикадин образованидин ва илимдин, жегьилрин крарай, гьакIни рекъемрин министерствойрин куьмекдалди ДГУ-дин Координациядин центради тешкилнавайди я, хабар гузва Даггосуниверситетдин пресс-къуллугъди.
Проектдин макьсад рекъемрин рекьяй гъавурда хьунин дережа хкажун я. Жегьилар интернетдин мумкинвилер ва рекъемрин технологияр нетижалудаказ ва хаталудаказ ишлемишун патал гьар са касдиз лазим тир бинелу чирвилералди ва алакьунралди таъминарда.
Мярекатда, хабар гузвайвал, Дагъустандин вузринни ссузрин 50 студентди иштиракда. Университетдин координациядин центрадин руководитель Мегьамед Мегьамедован гафаралди, и проект республикада сифте сеферда яз уьмуьрдиз кечирмишзава. Школадин иштиракчийри неинки цIийи чирвилер къачуда, абур гьакIни талукь тир жемиятдин (сообществодин) паюниз элкъведа, ида лагьайтIа, абуруз проектар гьазурунин рекьяй мастер-классра ва грантрин конкурсра, гьакIни и хиле тешкилзавай маса мярекатра иштиракдай мумкинвал гуда.
Мярекатдал Дагъустандай ва Москвадай тир киберхатасузвилин хилен пешекарар рахада. Лекцияр гьам офлайн, гьамни онлайн-къайдайра кьиле тухуда.
«Лезги газет»
