Сулейман Керимован мергьяматлувилер давам жезва
Машгьур меценат, сенатор Сулейман Керимова и йикъара Кеферпатан Кавказда виридалайни чIехиди тир Мугьаммад Пайгъамбардин (къуй Аллагьдин салам ва салават хьуй вичиз) тIварунихъ галай мискIин эцигна акьалтIарун патал Дагъустандин муфтиятдив пулдин куьмекдин кьвед лагьай пай агакьарна.
Къейд ийин хьи, санлай къачурла диндин имарат эцигуниз чи ватанэгьлиди 1,5 миллиард манат пул чара авунва. Идакай вичин телеграм-каналда РФ-дин Госдумадин депутат Хизри Абакарова кхьенва.
РД-дин муфтиятдин пресс-къуллугъди хабар гузвайвал, мергьяматлувилин такьатрихъ мискIиндин дараматдин цлар гуьрчегарда, мулкар авадан ийида, инженервилин сетар кардик кутада ва мискIиндиз къведайбуру дастамаз къачудай комплексар эцигда.
Алатай гьафтедин эхирра Дагъустандин муфтий Агьмад гьажи Абдуллаева Пайгъамбардин (къуй Аллагьдин салам ва салават хьуй вичиз) тIварунихъ галай мискIин эцигуник лайихлу пай кутунай телефондай зенгна Сулейман Керимоваз сагърай лагьана. “За Аллагьдиз Ада квез эцигунар акьалтIардай мумкинвал гунай шукур ийизва”, — къейдна муфтийди сенатордихъ галаз рахадайла.
Къейд ийин хьи, Сулейман Керимова эхиримжи йисара Дагъустанда мергьяматлувилин хейлин серенжемар кьиле тухузва. Мисал яз, ада куьмек гунин нетижада агъзурралди дагъустанвийриз гьаждал фидай мумкинвал хьана. Республикада коронавирусдин тIугъвал авай чIавуз сенаторди региондин духтурханаяр герек тир раб-дармандалди, медицинадин багьа алатралди (оборудование) таъминарнай. Хайи республикадихъ рикI кузвай кьегьал хциз вири дагъустанвийрин патай еке гьуьрмет ава.
«Лезги газет»
