“Дагъустан” РГВК-дин студияда тамам тушир мобилизациядиз, и важиблу серенжем республикада кьиле фейи гьалдиз, гьа са вахтунда чкайрал рехъ гайи гъалатIриз ва армиядиз эвер хъувунвай запасда авай аскеррихъ галаз тухузвай кIвалахдиз талукь месэлайриз бахшнавай гуьруьш кьиле фена. Ана республикадин военкоматдин, образованидин, здравоохраненидин, прессадин, жемиятдин, ветеранрин, волонтеррин тешкилатрин векилри, вузра, ссузра, школайра кIелзавайбуру иштиракна.
“Рахадай ихтияр ава” программа тухузвай журналист Ульяна Микаиловади кIватI хьанвайбурун фикир веревирд ийизвай месэлайрал желб авуналди лагьана: “Алай йисан 21-сентябрдиз уьлкведин Президент Владимир Путина тамам тушир мобилизациядикай малумарнай. Виринра запасда авай аскерар, офицерар армиядиз желб авунин кIвалах башламишна. Бязи чкайра, активвал къалуруналди, гъалатIризни рехъ гана. Президентди и йикъара малумарайвал, гьазурлухвилин частариз 222 агъзур кас агакьарнава. Бязи регионра мобилизациядин кIвалах куьтягьнава. Чун къе и жигьетдай чи республикада авай гьаларикай рахада”.
Гуьруьшдал гзаф инсанар рахана. Гьарда вичиз талукь тир хиляй малуматар гана, районра, шегьерра авай гьаларикай ва акьалтзавай несилдиз ватанпересвилин тербия гунин кар мадни хъсанарун патал вуч авун лазим ятIа, гьам лагьана.
Малум хьайивал, Дагъустанда тамам тушир мобилизация октябрдин эхирдалди давам жеда. Армиядиз желб авунвайбуруз республикада, Чечняда ва маса чкайрани герек вердишвилер гузва. Са пай Донбассдиз агакьнава. Гьукумдин органрин, военкоматдин, ветеранрин, прессадин векилри, депутатри абурал кьил чIугвазва. Саки виридан руьгь мягькемди, миллетбазрихъ, фашистрихъ галаз женг чIугуна, гъалибвал гваз хкведайди я. Женгер кьиле физвай частара дагъустанви аскеррихъ, офицеррихъ еке авторитет ава. Чи ватанэгьлийрин жуьрэтлувал, уьтквемвал, зиреквал акунвай чIехи командиррин тапшуругъдалди, аскеррин руьгь хкажун, женгера гъалиб хьун патал гьар са ротадиз, батальондиз, разведкадин дестедиз вад-цIуд кас дагъустанви желбзава.
Махачкъала, Дербент шегьеррин, Унцукуль, Ботлих районрин векилри хабар гайивал, мобилизация еке тешкиллувал аваз кьиле фена. ГъалатIрикай рахайтIа, повесткаяр лазим ксариз ганвай, амма военкоматри аялрин кьадардиз фикир ганвачир. Дагъустанда лагьайтIа, пуд аял авай хизанар гзаф я эхир. Гьавиляй пуд аялдин бубаяр кIвалериз элкъуьр хъувуна.
Хийир Эмиров
