Алай йисан 13-октябрдиз СтIал Сулейманан районда ОВД-дин цIийи дарамат ачухуниз талукьарнавай шадвилин мярекат кьиле фена. Ана Дагъустан Республикадин Кьил Сергей Меликова, Дагъустан Республикадин Гьукуматдин Председателдин заместитель Нариман Абдулмуталибова, Россиядин МВД-дин СКФО-да авай ГУ-дин начальник, полициядин генерал-полковник Сергей Бачурина, Дагъустан Республикадин къенепатан крарин министр Абдурашид Мегьамедова, райондин кьил Саид Темирханова, РОВД-дин патав гвай жемиятдин ва къайдаяр хуьдай органрин ветеранрини иштиракна.
Шад мярекатдал С.Меликова полициядин къуллугъчийриз лишанлу вакъиа мубаракна, абурухъ вилик эцигнавай везифаяр кьилиз акъудунин карда агалкьунар хьана кIанзавайди лагьана. Региондин Кьили гьакIни дарамат (санлай вири комплекс) эцигуник пай кутур вирибуруз чухсагъул малумарна.
— Гьуьрметлу дустар! — лагьана республикадин Кьили. — Къе куьн ва СтIал Сулейманан райондин вири агьалияр патал кьетIен югъ я. ЦIийи дараматдиз экъечIун полициядин къуллугъчийриз кIвалах менфятлудаказ ва намуслудаказ кьилиз акъуддай, вилик финин карда хъсан шартIар яратмишдай себеб хьун лазим я. И дараматда агьалийрин уьмуьрдин ери хъсанарунин жигьетдай РФ-дин Верховный Главнокомандующийди гузвай вири тапшуругъар кьилиз акъуддай шартIар тешкилнава. Полициядин везифа важиблуди, адалай неинки и органдин, гьакIни яшайишдин маса хилерин месэлаярни аслу я. Полициядин къуллугъчийри, сифте нубатда, агьалийрин патахъай фикир авун герек я. МасакIа хьун лазим туш, гьикI лагьайтIа, инсанри квехъ инанмишвал ийизвай, — къейдна С.Меликова.
Мярекатдин иштиракчийриз, къайдаяр хуьдай органрин къуллугъчийриз тебрикдин келимаяр РД-дин МВД-дин кьил, полициядин генерал-лейтенант Абдурашид Мегьамедовани лагьана. Ада къейд авурвал, къайдаяр хуьдай органра зегьмет чIугвазвайбуруз кIвалахдай вири жуьредин шартIар яратмишнава. И карни, сифте нубатда, абурун кIвалахди республикадиз ва адан агьалийриз ислягьвал, секинвал гун паталди авунва.
Мярекатдал рахай Сергей Бачурина Россиядин къенепатан крарин министр В.Колокольцеван тIварунихъай лишанлу вакъиа мубаракна, отделдин къуллугъчийрихъ кIвалахда агалкьунар хьана кIанзавайди лагьана.
Райондин кьил Саид Темирханова райондин вири агьалийрин, жемиятдин, депутатрин ва администрациядин тIварунихъай полициядин къуллугъчийриз лишанлу ва кьетIен югъ мубаракна.
“Алай аямдин комплекс эцигунай заз, сифте нубатда, Россиядин Федерациядин къенепатан крарин министерстводиз, республикадин руководстводиз сагърай лугьуз кIанзава. Са рахунни алачиз, къулай шартIар яратмишуни полициядин къуллугъчийриз чпин кIвалах, хиве авай везифаяр намуслудаказ кьилиз акъудунин карда куьмекда. Райондин администрациядини и проект кьилиз акъудуник пай кутуна. Са куьруь вахтунда 1,4 гектардин майдан авай чилин участок пул гана маса къачуна, ам гьавая федеральный хсусиятдиз вахкана, цIийи дарамат эцигна. Идалайни гъейри, райондин администрацияди цIийи дараматдин мулкара къир цунин, авадан авунин кIвалахар кьиле тухвана”, — къейдна С.Темирханова.
Мярекатдал тебрикдин келимаяр маса ксарини лагьана. Къайдаяр хуьдай органрин къуллугъчийриз лишанлу вакъиа тебрикиз алава образованидин идарайрин тербиячияр, “Леккур” ансамблдин кьуьлердайбур атанвай. Милли парталар алаз гъвечIи кьегьал Замир Небиева кIелай шиирди Дагъустандин Кьил Сергей Меликоваз ва мярекатдиз атанвай багьа мугьманриз екез таъсирна.
Мярекатдин сергьятра аваз кIвалахда тафаватлу хьайи къуллугъчийрив шабагьарни вахкана.
Хазран Кьасумов
