Маврикийдикай итижлу делилар
— Маврикий республика Индиядин океанда авай, Кьиблепатан Африкадин островдин государство я. Уьлкведин умуми майдан 2040 квадратный километрдикай ибарат я. Ана 1 миллионни 260 агъзурдалай гзаф инсанар яшамиш жезва.
— Маврикийда эвелдай инсанар авачир, юкьван асиррин девирда аниз арабар фена. Сифтедай абуру островдиз «Дина Ароби» тIвар гана.
— И уьлкведин пул маврикийдин рупия я.
— Маврикийда официальный чIалар авач. Агьалийри креольский чIалан чкадин нугъат ишлемишзава. Гзафбур ингилис ва френг чIаларални рахазва.
— Маврикий республика гьа и тIвар алай островдикай, гьакIни Родригесдикай, Агалегдикай ва Сен-Брэндон архипелагдикай ибарат я.
— Са девирра европавийриз Маврикийда хуьруьн майишат еримлу ийиз кIан хьана, амма къати гарари вири зегьметар тахьай мисалзавай. Ана жезвай пехъи гарариз анжах шекердин нацIаривай дурум гуз жезва. Гьавиляй хуьруьн майишатдин чилерин 90 процент шекердин нацIар гьасилунин рекье ишлемишзава.
— Маврикийдин са пай агьалияр индуизмдал амалзавайбур я.
— И уьлкведа гьар вад лагьай дишегьли ва гьар цIуд лагьай итим савадсуз я.
— Маврикийдин агьалийрин саки кьудай пуд пай Индиядай атайбурун несилар яз гьисабзава.
— Халкьдин кьадар артух хьунин жигьетдай Маврикий зайиф я — пуд йисан муддатда 1% хкаж жезва.
— Мадагаскардинни Маврикийдин арада 900 километрдин мензил ава.
— Маврикийда са университет ава. Ам уьлкведин меркез Порт-Луи шегьерда кардик ква.
— Уьлкведин агьалийрин умуми кьадардикай 40 процент меркезда яшамиш жезва.
— Маврикийдин вири телеканалар ва радиостанцияр государстводинбур я.
— Са мус ятIани Маврикий остров Франциядинди тир, ахпа Англиядинди хьана. 1968-йисуз аслу тушир уьлкве хьиз тестикьарна.
— Маврикийда январдизни февралдиз гьава виридалайни чими жеда, июлдизни августдиз — виридалайни мекьи.
— Агьалийрин рикI алай спортдин жуьре футбол я.
«Лезги газет»
