Гьуьрметлу “Лезги газетдин” редакция! Малум тирвал, цIи Дагъларин уьлкведин кьегьал хва, Дагъустандин сад лагьай регьбер хьайи Нажмудин Самурский дидедиз хьайидалай инихъ 130 йис тамам жезва. Им неинки са лезги, гьакIни республикадин вири халкьар патал лишанлу вакъиа я. Гьавиляй ам лайихлудаказ къейд авуна кIанда.

РикIел хквезва, Дербентдин кьиле Имам Яралиев авай чIавуз къадим шегьерда са парк Наж­му­­дин Самурскийдин тIвару­нихъ янай. И паркуна адан экуь къамат эбеди авунин мураддалди гуьмбетни хкажнайтIа, кутугай кар жедай.

Заз газетдин чинилай, вири ватанэгьлийрихъ ва кьилди къурушвийрихъ элкъвена, лугьуз кIан­зава: винидихъ къейднавай месэла гьялун — Дербентда Наж­­мудин Самурскийдиз гуьмбет хкажун па­тал чна къуватар садна кIанда. Ге­рекди и кардив жавабдарвилелди эгечIун я. Фи­кир­диз Нажмудин Са­мурскийдин хтул, Дагъустандин халкьдин игит Алик Эфендиев къвезва. Ам и кIвалахдин кьиле акъвазна, ихтилат физвай мес­эла гьялиз алахънайтIа, хъсан же­дай. Заз чиз, и кардик къуьн кутадай кьегьаларни экъечIда майдандиз.

Шихали  Багъиров