И йикъара Кьасумхуьрел, И.Тагьирован тIварцIихъ галай ме­дениятдин дараматда, Лезги чIа­лан йикъаз талукьарнавай кIел­чийрин акъажунар кьиле фена.  Алакьунар авай аялар винел акъудунин, абуруз куьмекар гунин, хайи чIал, меденият, ватан кIанарунин макьсаддалди тешкилай акъажунра райондин 26 мектебдин ученикри иштиракна.

Аялрин алакьунриз къимет гайибурун жергеда ИМЦ-дин директор М.Бабаханова, методист Н.Азимова, хайи чIалан муаллим Ж.Жигерова, урус чIалан муаллим Л.Мегьамедова, “Куьредин хабарар” газетдин кьилин редактор А.Мирзалиева авай.

Лезги шаиррин эсерар устаддаказ, фасагьатдаказ кIе­лунин акъажунрин нетижада 1-чка Саидхуьруьн мектебдин ученица Г.Агъа­керимовади, 2-чка ЦIийи Макьарин мектебдин ученик  Гь.Ферзалиева, 3-чка Эминхуьруьн мектебдин ученица М.Ба­баевади кьуна. Абуруз райондин образованидин управленидин патай грамотаяр ва Н.Алкадарскаядин “Ал­кьвадардилай тир Готфрид ва Генрих Гьасановар” ктаб пиш­кешна.

Л.Фетгьуьллагь