Уьлкведин вири пипlера хьиз, Докъузпара райондин Къалажухрин юкьван мектебдани 23-майдиз эхиримжи зенгиниз талукь шад мярекат кьиле фена.
Мектебдин вилик квай майдан шад вакъиадиз виликамаз гьазурнавай. Дараматдин цлар гуьрчег шикилралди, шараралди, эхиримжи зенгинин сувариз талукь кхьинралди чlагурнавай.
И югъ гьар са выпускникдин рикlел уьмуьрлух яз аламукьда. Шад мярекат мектебдин тешкилатчи Солмаз Шекиевади тебрикдин келимайралди ачухна ва ам кьиле тухун патал кьве выпускницадиз майдандал эверна.
И шад юкъуз мектеб куьтягьзавайбурун ва муаллимрин адресдиз хуш келимаяр лугьуз кlанибур гзаф жеда. Тебрикдин сифте гаф мектебдин директор Ирван Мусаеваз гана. Ада кьетlен югъ кlватl хьанвайбуруз мубаракна, сад тир гьукуматдин имтигьанар хъсандиз вахкана, гележегда выпускникриз агалкьунар хьана кlанзавай гафар лагьана.
Выпускникрин адресдиз тебрикдин гафар, тlалабунар хейлин муаллимри лагьана. Шад тедбирдал выпускникриз хуш гафар лугьуналди, экуь гележег тlалабуналди мектебдин завуч Аварбег Эвленов, хуьруьн администрациядин къуллугъчи Саидулагь Шекиев, райондин администрациядин патай Зелимхан Шагьламазов, муаллимар тир Рафик Балагьмедова, Рифат Сулейманова ва масабур рахана.
Рахай вирибуру выпускникриз вузрик, сузрик экечlна, гележегда хъсан, чlехи пешейрин сагьибар хьун, къуллугъэгьлияр хьун, хайи ватандиз ва четин тушир кlвалахда 11 йисуз тарсар гайи муаллимриз вафалу хьун, уьмуьрда хъсанвилер хьуналхишна.
Мярекат иштиракчийри кьуьлер ийиз, манияр лугьуз яргъалди давам хьана.
Миграгъ. Миграгърин юкьван мектебдани 23-майдиз эхиримжи зенгинин шад мярекат кьиле фена.
Мектебдин директор Фазир Абдуллаева выпускникрин адресдиз тебрикдин гафар лагьайдалай кьулухъ хъсан кlелзавай аялрив грамотаяр вахкана.
Мярекатдал аялрин диде-бубайрин комитетдин председатель Мирзали Ферзалиев, муаллимар тир Зина Сефибегова, Зуьгьре Муршидова, Лида Абасова, Эдгар Атемов, Шагьбуба Абасов ва масабур рахана. Абуру аялриз имтигьанар вахкунин карда, гьакl гележегда уьмуьрдани агалкьунар хьана кlанзавай алхишдин гафар лагьана.
Тебрикдин рахунрилай кьулухъ концертдин пай башламишна. Инал аялри шиирар кlелна, манияр тамамарна…
«Лезги газет»
