И мукьвара кьиле фейи Вирироссиядин яратмишунрин конкурсдиз мектебрин 1-11-классра  кlелзавай аялриз чпи яратмишай гьикая ракъурдай мумкинвал авай. Конкурс «Сергьят авачир алем», «Зун — космонавт», «Маса планетайрин цивилизация» ва «Чил сагърай!», «Гележегдин пеше» номинацийрикай ибарат тир.

Цlийи вад лагьай сеферда кьиле фейи конкурсда агъзурдав агакьна уьлкведин школьникри иштиракна. Конкурсдиз ракъурай гьикаяйрикай жюридин дестеди 50 хъсан гьикая хкяна, кьилдин ктаб гьазурна. Къиметлу пишкешрихъ галаз санал агалкьунар хьайибуруз и ктабни багъишна.

Къейд ийин, ктабда гьатнавай 50 эсердикай сад Докъузпара райондин Каракуьре хуьруьн СОШ-дин 7-классдин ученик Амин Нагъметулаеван «Маса планетайрин цивилизация» гьикая я.

Яратмишунин алакьунар авай жегьилдиз чна и агалкьун тебрикзава.

«Лезги газет»