Кьурагь райондин администрациядин пресс-къуллугъди хабар гузвайвал, 23-сентябрдиз райондин мектебра кIелзавай аялрин арада кьезил атлетикадай акъажунар кьиле фена. Ана 10 командади иштиракна. Аялри чукурунай (60 метрдиз ва яргъал мензилдиз), акъвазай чкадилай яргъаз хкадарунай, граната гадарунай, гьакIни эстафетадай чпин алакьунар къалурна. Акъажунрин кьилин судья Кьурагьрин 1-нумрадин юкьван школадин муаллим Герман Исаев тир.

Абур ачухуниз талукьарнавай шад мярекатдал рахадайла, райондин администрациядин физкультурадин, спортдин ва жегьилрин крарин рекьяй комитетдин начальник Ра­миз Рамазанова аялрихъ мягькем сагъвал, кIе­лун­ра агалкьунар хьун алхиш авунихъ галаз сад хьиз, спортдин серенжем тухунин къайдайрихъ галазни танишарна, адан важиблувиликай суьгьбетна.

Акъажунрин нетижада Кье­пIиррин мектебда кIелзавай аялрин команда 1-чкадиз лайихлу хьана. 2 ва 3-чкаяр КIи­рийрин ва Штулрин мектебрин командайри кьуна. Гъалиб хьайи­буруз кубокар, грамотаяр ва пишкешар гана.

«Лезги газет»