26-майдиз Сулейман-Стальский районда Россиядин Игит Радим Халикьов рикlел хкуниз талукьарна XIV сеферда яз волейболдай турнир кьиле фена.
Турнир Сулейман-Стальский райондин хуьрерин 6 командадин, гьакlни Белиж поселокдин, Дербент райондин ва Мегьарамдхуьруьн райондин Советский хуьруьн командайрин арада кьиле фена.
Турнир ачухунин гурлу мярекатда МР-дин кьил Нариман Абдулмуталибовани иштиракна. Ада ихьтин мярекатар тухунин важиблувиликай ихтилатна, Радим Халикьов хьтин дирибаш хциз тербия гайи диде-бубайриз сагърай лагьана.
Турнир ачухунин мярекатда райондин кьилин заместителри, Игитдин мукьва-кьилийри ва масабуруни иштиракна.
Турнирдин нетижада Кубокдиз Курхуьруьн команда лайихлу хьана. Кьвед, пуд ва кьуд лагьай чкаяр райондин 1-нумрадин ДЮСШ-диз, Агъа Стlалрин ва Советский хуьрерин командайриз хьана.
Гъалиб хьайи ва хъсан чкаяр кьур командаяр грамотайралди, дипломралди, медалралди ва пулдин пишкешралди къейдна.
«Лезги газет»
