Рехъ физвай касди атIуда, лугьузва бубайрин мисалда. Гьар са рекьяй агалкьунар жезвай, генгвилихъ виликди физвай Сулейман-Стальский райондин гьар са югъни мярекатрив, лишанлу вакъиайрив ацIун дуьшуьшдин кар туш. Майдин варз и жигьетдай мадни тафаватлу я: районда и вацра шадвилин са шумуд мярекат тухвана.
23-24-майдин йикъар. Санлай уьлкведа, республикада хьиз, абур райондани кьетIенбур хьана: школайра эхиримжи зенг яна. Ц1инин йисуз районда 11-класс 295 аялди акьалт1арна.
Мадни, эхиримжи зенг ягъунин мярекатдал КВН Юниор – лигада финалдиз акъатай школайрин командайрив «Умуд» фондунин патай 10 агъзур манатдин кьадарда аваз пулдин премиярни вахкана.
23-май. Арифдарринни шаиррин ватан тир АгъастIалрин юкьван школада лишанлу и йикъаз виликамаз хъсан гьазурвилер акунвайди гьасятда кьатIуз жезвай: школадин гьаят хъсан къайдада, пайдахралди, цуьквералди, гьар рангарин шараралди, плакатралди безетмишнава. Аниз гъилера цуьквер аваз школьникар, муаллимар, аялрин диде-бубаяр ахмиш жезва.
Сятдин 9 тамам хьайила школада эхиримжи зенг ягъуниз талукьарнавай шадвилин линейка башламишна. Багьа мугьманар яз мярекатда «Сулейман-Стальский район» муниципальный райондин кьил Нариман Шамсудинович Абдулмуталибова, Общественный палатадин председатель Алимет Алиметович Мейланова, райондин образованидин управленидин начальник Къачабег Аминович Аминова ва райадминистрациядин жавабдар маса къуллугъчийри иштиракна.
Шадвилин линейкадал кIватI хьанвайбурун гурлу капарик кваз, 1-классдин аялрин гъилерни кьуна, 9-11-классрин выпускникар атана.
Россиядин Федерациядин Гимн яна, 11-классда лап хъсан къиметар аваз кIелзавай выпускникри РФ-дин пайдах хкажна.
Сифте гаф школадин директор Феликс Мирзабеков рахана, ада школадихъ акъатзавай кIелунин йисуз хьайи нетижайрикай гегьеншдиз суьгьбетна.
— ЦIинин йисуз школа 14 выпускникди акьалтIарзава, — лагьана Феликс Мирзабекова. – Зун инанмиш я хьи, абуру Государстводин Сад тир экзаменарни агалкьунралди вахкуда, кIелунар вузрани колледжра давамарда. Заз выпускникрихъ гележегда хъсан крар, агалкьунар хьана кIанзава.
Гаф муниципальный райондин кьил Нариман Шамсудинович Абдулмуталибоваз гана.
— Гьуьрметлу школьникар, диде-бубаяр ва муаллимар! – лагьана Н. Ш. Абдулмуталибова. – АгъастIалар еке ва баркаллу тарих авай хуьр я, хуьряй ватанпересар, алимар, шаирар, тIвар-ван авай ксар гзаф акъатна. Хуьруьхъ хъсан адетарни гзаф ава. Куьне, гьуьрметлу выпускникар, машгьур хуьруьнвийрин ирс, бубайрин баркаллу адетар давамардайдак, абур къвезмай несилрал агакьардайдак за кIевелай умуд кутазва. Куьне къе школа акьалтIарзава, чIехи уьмуьрдиз кам къачузва. Са чIавузни муаллимрин, диде-бубайрин зегьмет рикIелай ракъурмир. Куьн Алкьвадар Гьасан эфендидин, Ярагъ Мегьамедан, Шарвилидин, Гьажи Давудан ирссагьибар хьун чи мурад я. Райондин администрациядин, Собранидин депутатрин ва кьилди жуван патай за къенин мярекатдин иштиракчийриз и лишанлу югъ мубаракзава ва выпускникрихъ агалкьунар хьун кIанзава. Къуй куь гележег экуьди, ислягьди, бахтлуди хьурай!
Тебрикдин хуш келимаяр гваз шадвилин мярекатдал райондин образованидин управленидин начальник Къачабег Аминович Аминов рахана, выпускникрихъ Государстводин Сад тир экзаменар вахкунин карда агалкьунар хьана кIанзавайди лагьана.
Нариман Шамсудинович Абдулмуталибова ва Къачабег Аминович Аминова, спортда кIелуна ва райондани республикада тухвай конкурсра тафаватлу хьайи школьникрив дипломар ва грамотаяр вахкана.
Райондин Общественный палатадин председатель Алимет Алиметович Мейланова выпускникриз несигьатар гана, хуш келимаяр лагьана, халис ватанпересар, бубайрин баркаллу адетриз вафалу инсанар хьуниз эвер гана.
Шадвилин линейкадал тебрикдин келимаяр гваз гьакIни АгъастIалрин хуьруьн поселенидин администрациядин кьил Низами Абдурагьманов, кIелунинни тербиядин рекьяй школадин директордин заместитель Фаизат Абдулмежидова, выпускникрин сифтегьан муаллимар хьайи Наида Абдурагьманова, Тамила Мирзебутаева, выпускникрин диде-бубаяр тир Мильвара Шайдабегова, Людмила Шихмегьамедова рахана.
1-классдин аялри мярекатдал выпускникриз бахшнавай шиирар кIелна, манияр лагьана.
11-классдин аялри 9-классдин аялриз хъсандиз кIелуниз, школадин хъсан адетар давамаруниз, муаллимриз, диде-бубайриз гьуьрмет авуниз эвер гана, абурув чирвилерин яржар – ктаб, шартIунин куьлег ва факел вахкана.
Школа акьалтIарзавай Назира Муртазалиевади ва Милана Шайдабеговади эхиримжи зенг яна.
Гуьгъуьнлай школьникри манияр лагьана, кьуьлер авуна, выпускникрини 1-классдин аялри райондин руководителрихъ галаз рикIел аламукьдай шикилар яна.
Мярекат гьам школьникар, гьам муаллимар, иллаки выпускникар патал рикIел аламукьдайди хьана.
Хазран Кьасумов
