Тарихдин адалат

РФ-дин Совбездин председателдин заместитель Д.Медведева малумарайвал, Донбассда референдумар кьиле тухун неинки ЛНР-динни ДНР-дин агьалияр датlана хуьнин, гьакI тарихдин адалат винел ахкъудунин жигьетдайни пара метлеблу я. Идакай ада вичин Telegram-каналда кхьенва.

Президентдилай рази я

Китайдин халкьди РФ-дин Президент В.Путиназ Тайвандин месэладай Китайдин тереф хуьнай сагърай лугьузва. “Новости” РИА-ди хабар гузвайвал, ихьтин фикир Сучжоудин университетдин профессор Г.Чжикая малумарна.

Алатай гьафтеда ШОС-дин (Шанхайская организация сотрудничества) саммитдин майданра В.Путинан ва С.Цзиньпинан гуьруьш кьиле фена. Путина малумарна хьи, США-ди Тайванда кьи­­ле­ тухузвай гьалдарунин гьерекатар Россияди меземмет ийизва. Къейд авурвал, Россияди “са Китайдин” принципдин тереф кIе­велай хуьзва.

США — гъулгъулайрин чешме

РФ-дин Президентдин пресс-къуллугъди малумарайвал, США масадбур сад-садал гьалдарунин, арайра гъулгъула тунин­ чешме я, Россиядини Китайди гьа ихьтин къимет гузва. Идакай “Новости” РИА-ди хабар гузва.

США-дин гьерекатрихъ галаз алакъалу яз Россиядинни Китайдин терефрин рафтарвилерикай рахадайла, Д.Пескова журналистдиз гайи интервьюдин чIук “Россия-1” телеканалдайни къалурна.

Украинадин мулкар туш

Румыниядин МИД-дин виликан кьил А.Марга малумарайвал, Украинади мулкарин бязи чкаяр къунши уьлквейрив вахкун лазим я.

“Тамам жавабдарвилелди лугьузва: Украина тIебии тушир сергьятра ава. Ада вичин мулкарилай “гъил къачун” герек я”, — лагьана ада.

Кьилди къачуртIа, А.Марга Украинади Венгриядив — Закарпатье, Польшадив — Галиция, Румыниядив — Буковина, Россиядив — Донбасс ва Крым вахкун герек яз гьисабзава. “Ибур маса государствойрин мулкар я”, — хълагьна ада.

Исятда Румыниядин МИД-дин кьиле авайбуру виликан министрдин фикир кьабулиз тежедайди я лагьанва.

Чечнядай ракъурна

19-сентябрдиз Чечнядин кьил Рамзан Къадирова вичин Telegram-каналда хабар гайивал, Донбассдиз гуьгьуьллу аскеррин цIийи десте ракъурнава.

“Грозныйдай Донбассдиз гуьгьуьллубурун нубатдин десте рекье гьатна. Абур вири виликамаз Гудермесда авай Россиядин спецназдин университетда гьазурлухвилин курсара хьана”, — кхьенва чешмеда.

Арада мензил аваз

Белгороддин областдин мектебар арада мензил аваз чирвилер гунин къайдадал элячIнава. Идакай федеральный са жерге чешмейри хабар гана.

Къейдзавайвал, Украинадин сергьятдивай 10 километрдин мензилда авай мектебра кIелзавай аялри кIваляй чирвилер къачуда. Сергьятдин патав гвай аялрин бахчайрикай рахайтIа, анжах дежурный группайри кIвалах давамарда.

Коронавирусдикай

Н.Гамалеян тIварцIихъ галай центрадин директор А.Гинцбурга малумарнавайвал, коронавирусдин штаммар муьжуьд вацра садра дегиш жезва. Адан фикир “Новости” РИА-ди раижнава.

РикIел хкайвал, алай вахтунда чун тIугъвалдин шартIара яша­миш жез 2 йисни зур я, и муддатда штаммар пуд сеферда дегиш хьана.

Залуквиле кьуна

Гуржистанда яракь гвай касди банкуна инсанар залуквиле кьуна. Идакай “Новости” РИА-ди хабар гузва.

Гуржистандин Кутаиси шегьерда авай банкарикай саниз маска алай инсан гьахьна. Залуквиле кьунвайбурун кьадар ва яракь гвайдан истемишунар тамамдиз гьелелиг малум туш. Агьвалат акур шагьидрикай сада ихтилатнавайвал, маска алайда 2 миллион манат (валюта малум туш) истемишнава.

Яхунариз куьмекда

Инсан яхун хьунин гьерекат йигинарун патал сабзеветар (зелень) гзаф тIуьн хъсан яз гьисабзава пегьризчийри. Пешекар Л.Московица теклифзавайвал, руфунал алай  (висцеральный)  пи кун патал успагьан (шпинат), руккола ва келем (кале) тIуьн хийирлу я. Адан гафаралди, и суьр­сетрик С, К витаминар, магний, кальций ва маса кислотаяр ква. Гьа са вахтунда калорияр —  тIимил.

Пешекар Л.Манакеран фикирдалди, яхун жез кIанзавайбуру гьар юкъуз кофе ва къацу чай хъун герек я. Гьар сеферда фу не­далди вилик са истиканда авай чай хъунни хъсан я лугьузва.

«Лезги газет»