И йикъара СтIал Сулейманан райондин центральный библиотекайрин къурулушдин (ЦБС) Курхуьрел алай библиотекадин заведующий Рустамова Элина Азимовнадихъ галаз адан кIвалахдикай суьгьбетна. За кьатIана: вичин пешедал Э.Рустамовадин рикI ала, кIвалахди адаз руьгьдин таъминвал гузва.
— Библиотекада 5429 ктаб ава. Мана-метлебдиз килигна, ктабар кьилди-кьилди эцигнава. Абур кIел-завайбурун кьадар гзаф я.
Гзафбуру фикирни авун мумкин я, библиотекада кIвалах авун регьят я лагьана, — чи суалдиз жаваб яз, суьгьбетна Элина Азимовнади. — ГьакI фикир ийиз хьайитIа, им ягъалмишвал я. Библиотекайра кIвалахзавайбурун хиве агьалийриз медениятдин рекьяй къуллугъунин, жегьилар ктабар кIелунал желб авунин, кIелзавайбурун арада тербиядин, марифатдин, ватанпересвилин рекьерай таблигъат тухунин везифаяр ава. Кьилинди хкянавай пешедал рикI хьун я. РикI алай пешедин иесидихъ кIвалахда агалкьунарни жеда.
Чун инанмиш хьайивал, библиотекада кIвалахзавай 20 йисан вахтунда Элина Рустамова хиве авай везифайрив рикI гваз, жавабдарвал гьисс авуналди эгечIзава. Ада библиотекада мукьвал-мукьвал кIелзавайбурун конференцияр, машгьур ксарихъ галаз гуьруьшар ва маса мярекатар тухузва. Идалайни гъейри, Элина Азимовнади ва библиотекадин кIелзавайбуру районда тухузвай гьар жуьредин мярекатра иштиракзава.
Чаз акурвал, библиотекада столрал “Дагестанская правда”, “Лезги газет”, “Куьредин хабарар”, маса газетринни журналрин подшивкаяр ала. Абурукай иниз къвезвай кIелзавайбуру менфят къачузва. “СтIал Сулейман — Дагъустандин халкьдин шаир”, “Курхуьр — виликдай ва гила” ва маса стендри, выставкайри иниз къвезвайбурун фикир чпел желбзава.
— Библиотека хуьруьн администрациядин дараматда кардик ква, — лугьузва администрациядин кьил Радик Гьажалиева. — Чаз аквазва хьи, Элина Азимовнади вичин кIвалах хъсандиз тешкилнава. Адалай агьалийри наразивал авур гьич са дуьшуьшни тахьуни и кардин патахъай шагьидвалзава.
И йикъара Элина Рустамовадиз яргъал йисарин намуслу зегьметдай Дагъустан Республикадин культурадин министр Зарема Бутаевадин къул алай гьуьрметдин грамота гана.
“Ашкъидалди кIвалахал физвай ва шадвилелди кIвализ хквезвай инсан бахтлу кас я”, — лагьанай туьркерин шаир Н.Хикмета. И келимаяр тамам 20 йисуз библиотекадин заведующийвиле намуслудаказ кIвалахзавай Рустамова Элина Азимовнадизни талукь я.
Хазран Кьасумов
