Лезгийрин машгьур манида лугьузвайвал, гад акъатна, зул хьана чаз, гьар са емиш бул хьана чаз. СтIал Сулейманан райондин хуьруьн майишатдин карханайри, КФХ-ри ва арендаторри емишар, ципицIар, салан майваяр кIватI хъийизва, мал-къарадиз тух кьуьд тешкилзава. ИкI, икьван чIавалди районда 30960 тонн векъи алаф — 28980 тонн векьер, 850 тонн самар ва 1130 тонн сенаж гьазурнава, “Горец” ООО-ди сенаж гьазурун давамзава.
Районда 1023 гектардай 2594 тонн техилни кIватI хъувуна. ЦIинин бегьер патал районда 282 гектарда маса гудай картуфарни цанвай.
ЦIи районда 102 гектарда къарпузар ва гатун халиярни гьасилна, анрай 5049 тонн бегьер вахчуна. И агалкьуник арендаторар тир Надир Къадимован, Роберт Къазиагьмедован, Малик Гьажимурадован еке пай ква.
Районда 369 тонн пIинияр ва шурван пIинияр, 7687,5 тонн шефтелар, 1348 тонн ичер, 1681 тонн чуьхверар, 128 тонн шуьмягъар — санлай 19656,5 тонн емишар, 26683 тонн салан майваяр кIватI хъувунва.
Ичер, салан майваяр кIватIун давам жезва. Къведай йисан бегьер патал районда зулухъай 600 гектарда зулун тумар цун пландик ква. Икьван чIавалди 330 гектарда цанар цанва, и кар давам жезва.
Хазран Кьасумов
