Мад са гъалибвал
Россиядин лап къуватлу пагьливанрин арада азаддаказ кьуршахар кьунай Казанда кьиле фейи 2022-йисан спартакиадада чи са жерге ватанэгьлийрини иштиракна.
Эхиримжи вахтара жуьреба-жуьре акъажунра вичин еке алакьунар къалурнавай Шамиль Мамедовакай 65 килограммдал кьван заланвал авайбурун арада гъалибчи хьана. Спартакиададин финалдин бягьсина адаз 4:1 гьисабдалди Гьажимурад Рашидов кумукьна.
Токиода кьиле фейи олимпиадада кишпирдин медаль къазанмишай Гь.Рашидован винел гъалибвал къачуналди, Ш.Мамедова вич лап къуватлубурун, гегьенш майданра иштиракиз жедайбурун жергедай тирди успатна. Са шакни алачиз, кьетIен вердишвилер авай Шамиль Мамедоваз дуьньядин дережадани еке агалкьунар къазанмишдай алакьунар ава.
Къейд ийин, Казанда кьиле фейи акъажунрин ярумчух финалдиз экъечIунин бягьсина Шамиль Мамедоваз чи муькуь ватанэгьли Рамазан Ферзалиев кумукьнай.
***
Вирироссиядин спартакиадада чи тIвар-ван авай пагьливан Даурен Куругълиевани (86 кг) иштиракна ва адаз кишпирдин медаль кьисмет хьана. Пуд лагьай чка патал ада Омар Зияутдиновахъ галаз бягьс кьиле тухвана.
“ТIарвал хьун себеб яз, финалдиз экъечIиз хьанач”, — лагьана Даурена.
Санлай къачурла, Казанда кьиле фейи акъажунра дагъустанви пагьливанри къизилдин — 7, гимишдин — 6, кишпирдин 5 медаль къазанмишна.
Шабагьар гана
И йикъара Мегьарамдхуьруьн райондин кьил Фарид Агьмедова футболдай райондин хуьрерин командайрин арада гьар йисуз кьиле физвай чемпионатда агалкьунар хьайибурув шад гьалара шабагьар вахкана.
“Районда спорт, кьилди къачуртIа, футбол еримлу авуниз чна еке фикир гузва. Футболдай чи жегьилри къазанмишзавай агалкьунрини чак хвешивал кутазва”, — лагьана райондин регьберди.
Малум хьайивал, чемпионатдин нетижада 1-чка Къуюстанрин командади кьуна, 2-чка — Гъепцегьрин командади, 3-чка — ЦIийи Филерин командади. Гъалиб хьайи командадиз чемпионатдин кубок, 25 агъзур манат, 2 ва 3-чкаяр кьурбуруз 20 ва 15 агъзур манат пулунин пишкешар гана.
Ф.Агьмедова ругуд сеферда Дагъустандин чемпионвилин тIвар къачур “Леки” командадин агалкьунарни къейдна. Райондин кьили “Леки” ФК-дин директордал хуьрерин командайрик кваз хъсан нетижаяр къазанмишнавай футболистар и клубдиз кьабулун тапшурмишна.
***
И йикъара Саранскда 18 йисал кьван яшара авай жегьилрин арада дзюдодай кьиле фейи Вирироссиядин спартакиадада вичин ери-бине Докъузпара райондин Мискискарин хуьряй тир Султан Алиева кишпирдин медаль къазанмишна. Идакай “Lezgisport” чешмеди хабар гузва.
С.Алиев Санкт-Петербургда яшамиш жезва. Акъажунра ада 66 килограммдал кьван заланвал авайбурун арада иштиракна.
«Лезги газет»
