(Хьайи кар)

Къарабег гададиз свас гъунин къайгъуйра авай. Свасни це лагьанвай. Ме­хъер авуниз герек затI-матIни къачунвай. Амма тек са якIун къайгъу ийиз хьан­вачир. Адаз са нивай ятIани Мирзе­метаз (тIварар дегишарнава) якIа-чIар­чIе авай, пуд йис хьанвай жунгав авайдакай ван хьана. Ам пакадин юкъуз жунгавдин иесидин патав фена, гададиз ме­хъер ийиз кIанзавайдакай, яни вичин дерди-гьалдикай ихтилатна. Жунгавдин къиметдин патахъай гьуьжетар, рази та­хьунин месэлаяр яргъал фенатIани, абур кьведни са гафунал акъвазна: жунгавдин къимет 175 агъзур манат хьу­­нин разивилел атана. Мирземета вичин кефини пайгар туш, мехъерик иш­тиракиз жедач лагьана, вичин патай мер­гьяматлувал авуна — жунгав 174 агъ­зур манатдихъ маса гунал рази хьана­.

Мехъерин дердиярни вири агатна, югъни тайин хьана. Гададин бубадиз мехъер гурлуди хьун патал хуьре авай банкетдин кьве залдикай вири терефрихъай безетмишнавай залда межлис кьиле тухун хъсан акуна.

Мехъер меслят хьайи юкъуз башламишна. Адет хьанвайвал, мехъерин иесидин, свас гъизвай гададинни сусан тIварарихъ акьалтIай хъсан келимаяр лугьудайбур, кьуьлер, шадвилер авунар яргъалди хьана. Мехъерин межлис куьтягь хьайи пакадин юкъузни мехъерин иесидин кIваляй къвезвай гьарай-вургьайдин ванерин тум-кьил авачир.

Жунгавдин сабурлу иесидивай сифте сад-кьве гьафтеда мехъерин иесидин патав физ жезвачир. Кьве варз алатна, эхирни ам, пул вахчун фикирда аваз, Къарабеган патав фена.

“Мехъерин буржар алама, пул гьатайла, за атана вав кIвале бурж вахкуда”, — лагьана, Къарабега Мирземет секинарна, кIвализ рекье хтуна.

Гьафтеяр, варцар, са йисни атана акъатна. Мирземетан къаридини пулунин патахъай гъуьлуьв секинвал вугузвачир.

Са йисни зур алатайла, Мирземет мад мехъерин иесидин патав фена.

— Са йисни зур вахтни алатна. Бес пул вахкун фикирда авачни? — хабар кьуна Мирземета.

Къарабега Мирземетаз ихьтин жаваб хгана:

— Жунгав за тIуьнач, ам хуьруьн жемятди, патай атай мугьманри тIуьна. Вуна фена пул гьабурувай вахчу!

Япарихъ ихьтин гуьзлемиш тавур гафар галукьай Мирзе­мет алай чкадал къах хьана, вуч хъийидатIа чин тийиз амукьна. Эхирни ам, курпашман яз, кIва­лиз рекье гьат хъувуна. Ам, кьве гъилив кьил кьуна, къаридиз вуч жаваб гу­датIа, низ арза-ферзе ийидатIа чин тийиз, ийир-тийир квахьна, язух къведай гьалдиз атанвай.

Ина аламат жедай вуч кар ава кьван? Бес алай девирда ягьсузар, луту­яр, небгетар, гьарамзадаяр тIимил гьалт­зава­ни? Абурун кьадар югъ-къандавай гзаф жезва. Гьавиляй абурун рекьер агалдай серенжемар кьабулун чарасуз я.

М.Исмаилов,

зегьметдин ветеран, пенсияда авай муаллим