Чи ватанэгьлияр — гьар сана
Малум тирвал, лезгийрихъ уьлкведин меркезда ФЛНКА кардик кваз гзаф йисар я. Урусатдин гьар жуьре регионра авай чи диаспорайри кьилдин тешкилатарни арадал гъизва ва милли итижар хуьнин карда алакьдай кIвалахар кьилиз акъудзава. Мисал яз, Ярославлдани, Тюменда лезги халкьдин милли медениятдин автономияр кардик ква. И сеферда зи ихтилат 2021-йисалай Тюменда авай, ТЛНКА-дин председатель яз зегьмет чIугвазвай Чигали Музафеддинович Алимовакай ва тешкилатди кьиле тухузвай кIвалахрикай я.
Чигали Алимов 1984-йисан 19-декабрдиз Азербайжандин КцIар райондин Чилегир хуьре дидедиз хьана. 1992-йисалди хайи хуьре яшамиш хьана, гуьгъуьнлай хизан Тюмень шегьердиз куьч хьана. Мектеб куьтягьайдалай кьулухъ Чигалиди сифтедай машиностроительный техникумда, ахпа машиностроенидин инженердин пешедай нафтIадинни газдин университетда кIелна. 2012-йисуз ада техникадинни технологиядин магистрдин дережа къачуна.
Халкьдал, ватандал, тарихдал рикI алай ватанэгьли фадлай лезги диаспорайрихъ галаз алакъада ава. Ам халкь патал, милли медениятдин ивирар хуьн патал вичелай алакьдай крар кьилиз акъудиз гьазур ва гьевес авай инсан я.
Чигали Алимова ихтилатзавайвал, студентвилин йисара ада Тюменда лезгинкадин хореографиядин секция ачухна ва гъвечIи гадайрин, рушарин дестейриз милли кьуьлер чирна. “Гьа чIавуз зун Тюменда кардик квай лезги милли медениятдин автономиядин кьиле авай Вагиф Керимовахъ галаз таниш хьана, — ихтилатзава ватанэгьлиди. — Чун сад-садаз чир хьуникди заз жуван кIвалахдизни цIийи рум гудай мумкинвал хьана. Зун жуван вири уьмуьрда футболдал машгъул жезвай. Чна мини-футболдай “Садвал” тIвар алай команда арадал гъана ва шегьердин акъажунра агалкьунралди иштиракна”, — ихтилатзава Ч.Алимова.
Гъиле кьур кар ашкъидивди кьилиз акъудиз вердиш жегьилдин хиве мад са важиблу везифа гьатна — лезгинкадин хореография кьиле тухунилай гъейри, ада цIийиз арадал гъайи футболдин командадин тренервални нетижалудаказ авуна. “Садвал” МФК-дин агалкьунрикай, дережадикай са тIимил чIавалай шегьердилай къецени хабарар чкIана.
“А чIавуз чна гзаф кьадар миллетар авай Тюменда лезгияр чпин ва масабурун арада дуствилелди, стхавилелди уьмуьр кьиле тухузвайбур тирди къалурна. Чи футболдин командадихъни гьуьрмет хьана”, — ашкъидивди рикIел хкизва ада.
Алай вахтунда ТЛНКА Тюмендин координационный советдик ква ва миллетрин арада авай алакъаяр мягькемарунин рекьяй кьиле тухузвай вири мярекатра, серенжемра иштиракзава.
“Милли диаспорайрин арада чна гьар йисуз ФЛНКА-дин ва “Национальное возрождение” фондунин куьмекдалди мини-футболдай “Садвилин” кубок тешкилзава. Исятда чахъ 5-7 ва 10-12 йисара авай аялар машгъул жезвай футболдин “Леки” клубни ава. Шегьердин, областдин акъажунра хъсан чкаяр кьазва”, — ихтилат давамарзава ада.
ТЛНКА-ди мукьвара хайи чIалал шиирар кIелунай гьам гъвечIибурун, гьам чIехибурун арада конкурс тешкилна. Къейдзавайвал, хейлин уьлквейра авай лезгийри конкурсда иштиракзава, шиирар кIелзавай видеороликар гьазуриз, тешкилатчийриз ракъурзава.
2021-йисуз Тюменда авай ватанэгьлийри умуми къуватралди текба-тек женгерин “Леки” тIвар алай клуб ачухунни шад жедай агалкьунрикай я. Спортсменрин арада са куьруь муддатда шегьердинни областдин акъажунра чемпионвилин тIварар къачуз хьанвайбурни ава.
“Чи тешкилатди асул фикир хайи чIал, меденият, дин хуьнин кIвалахриз гузва. Чи аялриз, хтулриз лезги руьгь, къилих, чи ацукьун-къарагъун, тарих чирун эвелни-эвел важиблу я. Гьа чIавуз чавай миллет хуьз, агалкьунралди виликди физ жеда. И ва я маса проект гъиле кьурла, такьатрин жигьетдай месэлаяр чна са фикирдал алай ярар-дустарихъ, чирхчиррихъ галаз умуми къуватралди гьялзава. Мярекатри халкьдин векилар сад-садав агудзава, дуствилин алакъаяр мадни мягькем жезва”, — къейдна халкьдин гележегдин къайгъуда авай ватанэгьлиди.
Чаз кIанзавайдини ТЛНКА-дин фикирдик квай вири крар агалкьунралди кьилиз акъатун я.
Куругъли Ферзалиев
