Россияда зегьмет чIугвазвай зун 2005-йи­суз хайи макандиз — ЦIийи Макьаз хтана.  Вахт хьайила, за дустарални кьил чIугвазвай. Нубатдин сеферда дуст Алисултанов Надирахъ илифнавайла (мебель маса гузвай хсуси туьквенда), иниз са шумуд итим атана. Абу­­­рукай садал офицердин партал алай. Патавай физвайбуру адаз салам гузвай, гьуьр­мет,  жузун-качузун йизвай.

Надира лагьана: “Ам чи райондин ОВД-дин начальникдин сад лагьай заместитель Фатулаев Абу­тIалиб Бабаевич я. Гзаф хъсан, гьахъвал кIан­дай, викIегь, халкьдиз вичивай жедай куьмек­ гузвай инсан. Адаз районда авторитет ава”. Зи патав ацукьнавай кьуланстIалви Абдулмажида алава хъувуна: “Ам чи хуьруьнви я, ша за вун адахъ галаз танишарин, ам ви хесетрихъ галаз кьадай, хъсан хизандай акъат­навай кас я”. Гьа инал чун таниш хьана. Адаз хъсандиз зи тIвар, фамилия, гьи хуьряй ятIа, гьи шегьердай зун хтанватIа чизвай. Зун гъавурда гьатна, АбутIалиб Бабаевич, уголовный розыскдин оперативник яз, вичин чкадал­ ала. Зунни адакай делилар чириз алахъна.

АбутIалиб  Фатулаев  1963-йисан августдиз Кьулан СтIалрин хуьре дидедиз хьана. Дах Фатулаев Бубади вичи вичиз туьрк, фарс, урус чIалар чирна ва Вини СтIалрин хуьре муаллимвиле, колхоздин бухгалтервиле  кIвалахна. Диде Иминат гамар храдай устIар тир. Абуруз 9 аял хьана, АбутIалиб муь­жуьд лагьайди тир. 1971-йисуз дах рагьметдиз фена. Аялар чIехи авун, абурув кIелиз тун, мехъерар авун — вири къайгъуяр Иминатан хиве гьатна. Аялри вирида кьилин образование къачуна. Руш Пенкер биологиядин илимрин доктор я, Москвада яшамиш жезва. Адаз вичин фирма ава.

1969-йисуз АбутIалиб сад лагьай классдиз фена. Эхиримжи классра кIелзавайла, гададин рикIе милициядин къуллугъчи хьунин мурад гьатна. Ам Вильнюсдин МВД-дин махсус школадиз гьахьна. Анаг  яру диплом къачуналди акьалтIарай АбутIалиб кIвалахиз Кабардино-Балкария республикадин МВД-диз ракъурна. Ина ам Прохладный шегьердин ОВД-да уголовный розыскдин оперуполномоченныйвиле тестикьарна.

Ина хъсан тежриба авай оперативникри кIвалахзавай. Чирвилер авай лейтенант бажа­рагълу оперативникрин гъиле гьатна, адаз хъсандиз кIвалахиз чирдайбур хьана. Вахтар­ чIурубур тир, СССР-да М.Горбачев перест­ройкадив гатIуннавай. Уьлкведа заводар, фабрикаяр, колхозар, совхозар барбатIзавай, кооперативар кардик кутазвай. Майдандиз та­рашчияр, бандитар акъатзавай. Кесиб халкьдин гьал пис жезвай, шегьерра, хуьрера секинвал авачир.

Милициядин къуллугъчийри, бандитрин хура акъвазна, абурухъ галаз женг чIугуна кIан­завай. АбутIалиба вичин везифаяр ви­кIегьвилелди тамамарна. Къунши республикада кIвалахдайла, ада 200 тахсиркарвал дуьздал акъудна. Адаз старший лейтенантдин чин гана, кIвалах авур са йисалай адакай  уголовный розыскдин старший оперативный уполномоченный хьана.

И вахтара автомашинар туьквенрай ачухдиз маса къачуз жезвайди тушир. АбутIа­ли­ба тухузвай кIвалахдиз хъсан къимет гуналди, Прохладный шегьердин исполкомдин председателди адаз цIийи автомашин маса къачудай мумкинвал гана.

1992-йисуз АбутIалиб Кьурагьрин РОВД-дин уголовный розыскдин старший опер­упол­номоченный яз кIвалахал акъвазна. Ирид йисуз кIвалах авурдалай гуьгъуьниз Абу­тIалиб СтIал Сулейманан райондин ОВД-диз хтана. Сифте адакай старший оперуполномоченный, ахпа  2000-2011-йисара РОВД-дин начальникдин сад лагьай заместитель хьа­на.­

АбутIалиб Бабаевича, МВД-дин органра кIвалахдайла, кьилел атай са дуьшуьш рикIел хкиз кIанзава.

2009-йисан июндин варз тир. Сийидхуьруьн патавай, Чирагъ вацIун кьеряй жендекдивай къакъуднавай дишегьлидин кьил жа­гъана. Пакадин юкъуз гьа и вацIун кьеряй Кур­хуьруьн патавай инсандин кIвачер, гъилер жагьана. АбутIалиб Бабаевич кьилеваз оперативникар ихьтин зулумдин тахсиркарвал авурди жагъурунив гатIунна. Хейлин ахтармишунар кьиле тухвана, хабарар кьуна, силис тухвана. Кьенвайди урус дишегьли тир. Табасаранвидиз кьисмет хьанвай  ам хизан галаз Хивда яшамиш жезвай. Умуьрдин юлдаш рагьметдиз фенвай. Хва адахъ галаз къалар жез хьана. Эхир хци вичин диде кьенвай. Судди алчахдиз 12 йис кар атIана.

Ихьтин мисалар АбутIалиб Бабаевичан уьмуьрдай гзаф гъиз жеда. Ада МВД-дин органра кIвалахай йисар рягьятбур тушир.

2013-йисан мартдин вацра АбутIалиб Бабаевич Кьурагь райондин полициядин отделдин начальниквиле тестикьарна. 2017-йисуз ам СтIал Сулейманан райондин администрациядин кьилин хатасузвилин рекьяй заместителвиле тайинарна. И везифа алай вахтунда гзаф жавабдарди я. Терроризмдин, экстремизмдин идеологиядиз къуллугъзавай, государственный къурулуш чукIурна,  чпин къайдаяр тваз кIанзавай инсанрин вилик пад кьун, абурухъ галаз  женг чIугун та­вур­тIа, гьалар чIур жеда. АбутIалиб Бабаевичаз и кIвалах  хъсандиз чизва,  ада райондин къайдаяр хуьдай органрихъ, ветеранрихъ, авторитет авай пенсионеррихъ, школайрин муаллимрихъ галаз санал жегьилрин арада терроризмдиз, экстремизмдиз акси кIвалах тухузва. Лагьана кIанда, са шумуд сеферда зани АбутIалиб Бабаевича тухузвай мярекатра иштиракна. Райондин администрациядин кьил Темирханов Саид Фатулаеван кIвалахдилай пара рази я: “Абу­тIалиб Бабаевича вичин везифаяр лап хъсандиз кьиле тухузва”.

АбутIалиб Бабаевичаз  инсанрихъ галаз рахаз чида, абуруз вичивай жедай куьмек гуда, законар чIурзавайбурун вилик пад кьада. Ам гьахъвал кIандай инсан я. АбутIалиб Бабаевича, кIвалахдивай къерех тахьана, РФ-дин МВД-дин Ростовдин юридический институтни куьтягьна. Подполковникдиз ихьтин шабагьар ава: “Намуслудаказ къуллугъ авунай” 1, 2, 3 дережадин, “Кавказда террордиз акси операциядай”, Жукован медалар ва “Буржидиз вафалувиляй” знак.

Виридалайни чIехи шабагь, гьелбетда, халкьдин патай къазанмишнавай гьуьрмет я.

Масуб  Магьмудов,

отставкада авай полковник