Спортдал рикI алайбуруз малум тирвал, какахьай жуьредин текба-тек женгерин алем, цIийи-цIийи тешкилатар, лигаяр пайда хьуналди, йисалай-суз гегьенш ва машгьур жезва. Шад жедай кар ам я хьи, ММА-дин про­моушенрин арада “Леки” тIвар алай цIийи лига пайда хьанва. Ам арадал гъанвайди вичин ери-бине Хив райондин ЦIийи Фригъай тир, Москвада яшамиш жезвай спортсмен, тренер  Эльмар  Телманович Гьа­жиагьмедов  я. РикIел хкиз кIанзава, самбодай, грэпплингдай ва какахьай женгерай кьиле фейи пешекарвилин акъажунра еке агалкьунар къазанмишнавай  Э.Гьа­жиагьмедова 2019-йисуз уьлкведин меркезда “Леки” тIвар алай спортдин клуб арадал гъанай ва ана спортдал машгъул хьайи чи хейлин ватанэгьлийри кесерлу акъажунра чпин гьунарарни къалурнай.

Гила ватанэгьлиди тешкилнавай “Леки” цIийи лигади Россиядин, СНГ-дин уьл­квей­рин дережайра спортдин какахьай женгерин хиле гегьенш камар къачудайвал я. Кьилди къачуртIа, машгьур пагьливанрин иш­тираквал авай пресс-конференцияр, женгерин чIехи шоуяр, спортсменрихъ галаз гуьруьшар, акъажунар тешкилун фикирдик ква.  Алай вахтунда телеканалрихъ галазни икьрарар кутIуннава.

• “Леки” лига ачухдай фикир ви кьилиз гьикI атана? — хабар кьуна за Эльмар Гьажиагьмедовавай.

— Жуьреба-жуьре маса лигайра бягьсер кьиле тухузвай спортсменар чахъ тIи­мил­ авач. Гьабуру чи лигада иштиракун, спортдин рекьяй ватанэгьлийриз вилик фи­дай мумкинвал хьун патал чи кьилиз “Ле­ки” тешкилат арадал гъунин фикир атана.

• Заз малум хьайивал, квез мукьвара акъажунар тешкилиз кIанзава.

— Эхь, “Леки” лигади алай йисан 18-сентябрдиз Москвада пешекарвилин сад лагьай турнир кьиле тухуда. Гьевескарвилин сад лагьай акъажунар чи лигади алай йисан 3-июлдиз кьиле тухвана, ана 140 спортсменди иштиракна. Пешекарвилин гегьенш турнирда алакьунар авай чи ва Тажикистандин, Къиргъи­зистандин, Узбекистандин ва масанрин спортсменри иштиракда.

• Гегьенш турнирар тешкилун еке харжиярни истемишзавай крар я. Такьатрин патахъай месэлаяр гьикI гьялзава?

— ГьакI я, гьакъикъатдани. Сад лагьай турнир кьиле тухун патал 600 агъзур манат герек жезва. Чаз чи ватанэгьлийри, меценатри куьмекар гузва. Умуми къуватралди чна тешкилатдин кIвалахар еримлу ийида.

• “Леки” лигадин командада мад вужар ава? Ваз тешкиллувилин кIвалахар кьиле тухуз ни куьмекзава?

— Атав Атаев вице-президентни, операторни я. Куьмекар гудай лезгияр тIимил авач. “Леки” лига арадал гъунин кьилин макьсад чи спортсменар вилик тухун, алакьунар авайбур винел акъудун я. Сир туш, чпин алакьунар къалуриз кIандайбур, амма акъажунра иштиракдай мумкинвал тежезвайбурни ава чи хуьрера. Ахьтин ватанэгьлийривай чи тешкилатдив агатиз жеда.

• Рехъ физвайда атIудайди я. Къуй “Леки” тешкилат дуьньядин дережада машгьур хьурай!

Куругъли КIелетви