Дуьньядин жуьреба-жуьре пипIера хьиз, СтIал Сулейманан райондани мергьяматлувилин кIвалахар кьиле физва. Районда тешкилзавай саки вири мярекатрик жумарт ксари чпин пайни кутазва: ина аялрин бахчаяр, мектебар, спортдин дараматар эцигзава, инсанриз къекъведай ва улакьар патал шегьре рекьер туькIуьрзава, дарда авай хизанриз куьмекар гузва ва икI мад.

Республикада коронавирусдин тIугъвал пайда хьайила, шегьеррани районра мергьяматлувилин гьикьван серенжемар кьиле тухванайтIа рикIел хкин: дарманар, инсанар хуьдай махсус парталар (спецодежда), алава мажибар, чарасуз лазим къвезвай тадаракар, сагъламвилин идараяр, цIудралди маса крар. Ибур вири Аллагьдин патай чIехи рикI ганвай чи кьегьал рухвайрини рушари пай кутур крар я.

Мад сеферда ихьтин са хъса­н кIвалахдин шагьид хьана чун. Ихтилат СтIал Сулейманан райондин Пиперхуьряй тир жегьил спортсмен, муниципали­тетда же­гьилар патал кардик квай парламентдин регьбер, тIвар кьур хуьруьн депутат  Фарид  Асретович  Девлетханован  мергьяматлувилин крарикай я.

Вич Махачкъала шегьерда чIехи хьанатIани, Фарид Девлетханова, багъри ерийриз хтана, ви­чивай жедай вири куьмекар гуз­ва, бубайрин макан авадан хьуник вичин пайни кутазва. Вич хьтин жегьилар, мерд инсанар са­­нал кIватIна, ада саки 400 метр­дин мензилда хайи хуьре цин тур­баяр дегишарнава, улакь вилив хуьзвай инсанар акъваздай чка авунва, анал цIийи булах, капI ийидай кIвал эцигна, инсанриз ял ядай пIипI кардик кутунва, дяведин йисара телеф хьайи кьегьалриз бахшнавай гуьмбет хкажнава, хуьруьнвийриз экв бес жезвач лугьуз, цIийи трансформатор эцигна, 15 шалман акIурна, эк­верин линияр тухвана. Вири и кра­рал алава яз, хуьр йифен вахтунда ишигълаван авун патал гьар са шалмандал фонарар эцигнава.

Фарид Девлетханов са акьван девлетлу кас туштIани, адалай ихьтин мергьяматлу крар ийиз алакьна: вич кьиле акъвазна, Аллагь рикIел алай стхайрин куьмекни галаз сувабдин крар авунва. Сагърай вич! Жемятдини адаз баркаллу хва лугьузва. Къуй ада кьил кутуна авунвай крар Аллагьди кьабулрай ва, Фаридалай чешне къачуна, ихьтин крар кьилиз акъуддай ксар чи хуьрера мадни гзаф хьурай!

Эльвира Небиева