13-августдиз Ахцегь райондин Смугъулрин хуьре тарихдин метлеб авай вакъиа хьана: ХVIII асирдин мискIин (адан цла тунвай тарихдин къванцел атIанвай кхьинрай якъин жезвайвал, дарамат 1735-1736-йисара эцигна, 1782-йисуз туькIуьр хъувуна) цIийикIа туькIуьр хъувурдалай кьулухъ ачухна. И кардиз талукь яз хуьре сифте республикадин дережада аваз диндин межлис кьиле фена.
Алимрин межлис, цIийи хъувунвай мискIин ачухун тебрикуналди, Мугьаммад гьажи Майрамова ачухна. Кьуръандин пак аятарни нашидар кIелун патал гаф Заур гьажи Салигьоваз гана. Ахпа мярекатдин иштиракчийрин вилик диндин рекьяй алимар рахана, диндин месэлайрай суал-жавабдин къайдада кьиле тухвай викторинадин гъалибчийриз савкьатар гана. Акьалтзавай несилдин векилриз Ислам диндин, ахлакьдин ва ватанпересвилин руьгьдаллаз тербия гунин кардик пай кутунвай са десте ксарив РД-дин Духовный управленидин патай пишкешар, гьуьрметдин грамотаяр ва разивилин чарар вахкана.
Диндин межлисдин сергьятра аваз гзаф инсанар рахана. Абурукай бязибуру авур ихтилатар чна агъадихъ гузва.
Мурад Шафиев, РД-дин милли сиясатдин ва динрин крарин рекьяй министрдин заместитель. — Эхиримжи вахтунда гьукуматди диндин, руьгьдин месэлайриз еке фикир гузва: теологиядин илимдиз государстводин дережа ганва, Дагъустандин гуманитарный институт ачухнава, чи министерствода чкайрал диндин тешкилатрин гъил кьадай программа кьабулнава, Дагъустанда диндин рекьяй чирвилер гузвай, чпихъ лицензияр авай 5 кьилин идара ва 500-дав агакьна медресаяр ачухнава ва икI мад. Мурад руьгьдин, эдеб-ахлакьдин, тербиядин рекьяй дерин чирвилер авай медени ксар — диндин алимар арадал гъун я…, — лагьана, ада РД-дин милли сиясатдин ва диндин крарин рекьяй министр Энрик Муслимован патай мярекатдин иштиракчийрив саламар агакьарна.
Гьуьсейн гьажи Гьажиев, РД-дин Муфтиятдин векил. — Хуьре мискIин эцигун сувабдин кар я, ам гьар йикъан куьтягь тежер ката-калтугуникайни четин месэлайрикай хкечIна, мусурманрин рикI, руьгь секинарзавай хийир-дуьадин чка я. МискIинда чи уьммет сад ийидай, иман мягькемардай, диндин чирвилер артухардай мумкинвал ава. Ина чун, гуя Аллагьдин кIвале мугьманвиле ава, Адаз икрамиз, ибадат ийиз акъвазнава. Смугъулрин имам Абдулла гьажиди кьил кутуналди ва жемят желб авуналди, тарихдин куьгьне мискIин туькIуьр хъувуна, кардик кухтун — им адан патай сувабдин кар хьана. Пара кьадар сагърай!
Мярекатдал рахайбурун арада гьакIни РД-дин Халкьдин Собранидин депутат Мегьамед Алиханов, Ахцегь районда РД-дин Муфтиятдин векил Узаир гьажи Шамилов, РД-дин муфтийдин заместитель Мегьамедрасул гьажи Саадуев, Дербентда Ярагъ Мегьамедан тIварунихъ галай мискIиндин имам Шамил гьажи Рагьманов ва масабурни авай.
Дашдемир Шерифалиев
