КIвалахдин рекьяй СтIал Сулейманан районда авайла, Дагъустан Республикадин хуьруьн майишатдин ва суьрсетдин министр Мухтарбий Аджеков хуьруьн майишатдин рекьяй авай мумкинвилерихъ, багъманчивилин хиле инвестицийрин зурба проектар уьмуьрдиз кечирмишзавай гьалдихъ галаз таниш хьана.
Кьилди къачуртIа, РД-дин хуьруьн майишатдин ва суьрсетдин министерстводин набататчивилин отделдин начальник Агьмед Расуловахъ, СтIал Сулейманан райондин кьил Саид Темирхановахъ, райондин депутатрин собранидин председатель Штибег Мегьамедхановахъ, райондин хуьруьн майишатдин ва суьрсетдин управленидин начальник Къазиагьмед Къазиагьмедовахъ галаз санал министр М.Аджеков набататчивилел машгъул агропромышленный майданрал, хуьруьн майишатдин продукция маса гунал машгъул фермервилин центрадал фена.
М.Аджековаз акурвал, гзаф бегьер гудай багълар кутунин зурба проект “Полоса” ООО-ди уьмуьрдиз кечирмишзава. Гьар са гектардал 3500 къелем ацалтдайвал, 311 гектардин майданар лап гзаф бегьер гудай ичин багълари кьунва. Фикир гуниз лайихлу кар мадни ам я хьи, 1000 гектарда шуьмягърин багъларни кутунва. Им неинки Россияда, гьакI Европадани шуьмягърин виридалайни чIехи багъ я.
Мукьвал тир йисара ихьтин багъларин майданар 1000 гектардив, шуьмягърин багъларни 2000 гектардив агакьарда. Мадни, кура-кура 50 агъзур тонн емишар хуьдай чкани эцигун пландик ква, адан сад лагьай пай 2023-йисуз эцигна акьалтIарда. Ана 11,5 агъзур тонн емишар хуьз жеда.
Мухтарбий Аджекова СтIал Сулейманан райондин агропромышленный хилез рази жедай къимет гана.
— Багъманчивал хуьруьн майишатдин адет хьанвай ва кар алай хел я, республикадин экономикада адахъ зурба метлеб ава, — лагьана министрди. — Эхиримжи йисара гзаф инсанриз хуьруьн майишатдин хиле еке мумкинвилер, гележегда умуд кутаз жедай крар жагъизва. Агропромышленный хиле цIийи технологияр ва кIвенкIвечи къайдаяр яратмишда. Хуьруьн майишат виниз тир технологиядин ва хийир гъидай бизнесдиз элкъвенва. Идалайни гъейри, инвестицийрин зурба проектри вири дережайрин бюджетриз къвезвай налогрин кьадар артухарзава, мадни агьалияр экологиядин жигьетдай михьи продукциядалди таъминарзава. Государстводини и проектрин тереф хуьзва. Багъманчивилихъ Дагъустанда еке гележег ава.
Саид Темирханова районда тухузвай кIвалахриз дикъет гунай Мухтарбий Аджековаз чухсагъул лагьана ва районда инвестицийрин проектар уьмуьрдиз кечирмишуниз республикадин Гьукуматдин, хуьруьн майишатдин ва суьрсетдин министерстводин патай гележегдани куьмек хьуник умуд кутуна.
Хазран Кьасумов
