Инсанри хкязавай пешейрин арада виридалайни кьетIенди ава — Ватан хуьдайди! Ватан кIан хьунин ва хуьнин гьиссер гзаф инсанрин бейнидик дидедин некIедихъ галаз акатзава. Лезги халкьдин арадай кьегьал рухваяр, чIехи ватанпересар вири девирра акъатна, абур чи йикъарани ава.
Ихьтин веревирдер ийидайла, рикIел Дагъустандин халкьдин шаир Майрудин Бабаханован шиирдин цIарарни къвезва: “Ватандин сир алцум жедач камарални чипIерал, ам алцумиз жеда анжах адахъ кузвай рикIерал”. Ватандихъ рикI кузвай кьегьал рухвайрикай яз, завай Украинада тухузвай женгинин махсус серенжемда гьа сифте йикъарилай иштиракзавай капитан Хсейхан Азимович Шихабдулаеван тIвар кьаз жеда. СтIал Сулейманан райондин Агъа СтIалрин хуьряй тир ам, рухсат гана, кIвализ хтанвай. Чаз адахъ галаз гуьруьшмиш жедай мумкинвал хьана.
— Офицер хьун гьеле школада кIелзавай йисарилай зи рикIе авай мурад тир, — суьгьбетзава Хсейхан Азимовича. — Гьавиляй 2008-йисуз юкьван школа акьалтIарай зун Тюмень шегьерда кардик квай маршал А.И.Примлякован тIварунихъ галай Высший военно-инженерный командный училищедик экечIна.
Хсейхан Шихабдулаева военный училище лейтенантвилин чин ва хъсан чирвилер аваз 2013-йисуз акьалтIарна. Офицерди Ватандиз къуллугъ авунин рехъни Санкт-Петербург шегьердин военный институтда инженерно-технический взводдин командирвилелай башламишна.
Къуллугъдин гурарайни фад-фад хкаж хьана. Ада жуьреба-жуьре частара команда гудай гьар жуьредин къуллугъар тамамарна, аскеррин ва командованидин патай лайихлу гьуьрмет къазанмишна.
2021-йисалай капитан Х.Шихабдулаева Москва шегьерда Дзержинскийдин тIварунихъ галай ОДОН-да (отдельная дивизия оперативного назначения) къуллугъзава.
Хиве авай везифаяр викIегьдаказ кьилиз акъудунай капитан Шихабдулаеваз Россиядин Федерациядин Президент Владимир Путинан Указдалди 2022-йисан 27-мартдиз “Жуьрэтлувиляй” медаль гана.
— Россиядин Яракьлу Къуватри Донецкдин ва Луганскдин Халкьдин Республикайра махсус серенжем тухун маса чара амачирла авур кар я, — лугьузва Хсейхан Азимовича. — Украинадин миллетчийри кьве республикадани яшамиш жезвай чи стха халкьариз инад кьаз са шумуд йис тир. Украина дяведиз гьазур хьанвай. Америка кьиле аваз къе НАТО-ди Украинадиз алай аямдин яракьар гузва, аниз боевикар ракъурзава. ЯтIани, чун гъалиб жеда.
Хсейхан Азимович гьуьрметлу хизандин кьилни я. Уьмуьрдин юлдаш Разия Алимовнадихъ галаз санал кьве аял тербияламишзава.
Рухсатдин вахт куьтягь хьайила, Хсейхан Украинадиз хъфида, ада махсус серенжемда иштиракун давамарда.
Хазран Кьасумов
