27-июлдиз Ахцегьиз РФ-дин Госдумадин депутат, Кьиблепатан сечкидин округдай хкягъай “Сад тир Россия” политпартиядин векил Гьасанов Жамалдин мугьман хьана ва ада агьалияр кьабулна. Гуьруьшда “Ахцегь район” МР-дин кьилин заместитель Роберт Гьамзаева, райадминистрациядин крар идара ийизвайди тир Расим Османова, райондин общественный палатадин председатель Али Исмаилова ва чкадин СМИ-дин векилри иштиракна.

Гьукуматдин 3-классдин гьакъикъи советник Жамалдин Гьасанов РФ-дин Госдумадин ­Федеральный Собранидин 5,6, 8-созыврин дупутат ва 2019-2021-йисара Да­гъустан Республикадин патай РФ-дин Президентдин ­патав гвай векил тир. Районэгьлийрихъ галаз гуьруьш ада Луткунрин хуьруьн цIийи школада тешкилна. Инсанар кьабулдалди вилик райондин руководстводин ва эци­гунрин пудратчидин векиларни галаз ам 400 аялдиз чкаяр жедай ва сентябрдиз иш­лемишиз вахкун лазим тир школадин мум­­кин­ви­лерихъ галаз таниш хьана, пара ра­зи яз амукьна.

Жамалдин Набиевичан фикирдалди, чкайрал фена, инсанрихъ галаз ачухдиз суьгьбет авун, абур кьабулун халкьдин депутатди жемятдихъ галаз кIвалахунин лап нетижалу къайда я. Инсанрин дердийрихъ яб акалун, мумкинвилериз килигна, куьмекун халкьдин векилдин буржи я. И тегьерда  абурун яшайиш хъсанариз, инсанрин патай уьлкведин властрин органриз ихтибарвал арадал гъиз жеда.

Ахцегьрин 3-школадин директор  Мейрам Рамазановади тавакъу авурвал, райондин 4 школада стуларни столар лап куьгьне хьанва, абур аялар ацукьдай гьалдай акъатнава, чарасуз 189 столни 278 стул кIанзава. Идан патахъай республикадин талукь идарайриз чарарни кхьена, амма файда авач.

Эльдар  Агьмедов,  Луткунрин шко­ладин директор. — Чи хуьре Самур дереда авачир хьтин еке ва къулай шартIарин школадин да­рамат эцигунай райондин, республикадин ва уьлкведин гьакимар пара кьадар сагърай! Анжах са кар ава: школа хуьруьн центрадивай саки 2 километрдин яргъа ава. Аялар аниз тухуз-хкун патал автобусни ганайтIа, хъсан тир.

Мамед  Агьмедов,  Хуьруьгрин школадин директор. — Райондин руководстводин ала­хъун­ралди эхиримжи йисара цIийи школа, стадион, просвещенидин “Люминари” центр эцигна, ял ядай паркар туькIуьрна, клуб ремонтна, куьчейра къир цана — чи хуьр чир техжервал дегиш хьанва. КIвалера тIебии газни хьанайтIа, гаф авачир. КьакIарин, Хуьруьгрин, Цуругърин, Ялахърин, Фиярин, Хинерин ва Гутумрин хуьрер газдалди таъминарун патал алахъун лазим я.

Багъир  Забитов, “Чеперин хуьр” СП-дин кьил. — Чи хуьруьз чпин харжийрихъ тIебии газ гъайи стхаяр Шириновар сагърай! Гила хуьруьн яшайишдин метлебдин важиблу месэла — дуьзгуьн рехъ тахьун я. За кIва­лахзавай 5 йисан къене рехъ  ремонтун патал  Гьукуматдин патай акунвайди анжах 100 литр солярка я. Хуьруьз къвезвай 9 километрдин хъсан рехъ хьайитIа, шегьеррай са шумуд хизан хайи ватандиз хтана, чпин бубайрин кIвалер туькIуьр хъувуна яшамиш жез гьазур я.

Ада депутатдивай чпин рехъ туькIуь­рун­ Гьукуматдин программадик кутун тIа­лабна.

Жафер  Жалилов,  “Калукрин хуьр”   СП-дин  кьил.   —   Чи   хуьрени  республи­ка­дин балансдал алай 1700 метрдин рехъ чIимел вахтунда кьар, амай береда руг гьатиз, пара пис гьалда ава. Инжиклу жезвай жемятдин патай наразивилер арадал къвезва. А рекье къир цанайтIа, чи хуьруьн вири ­жемятди квез хийир-дуьа ийидай, — лагьана ада.

Амирхан  Рагьимов, “Сельсовет ­Луткунский” СП-дин кьил. — Чи хуьруьн адми­нистрациядик гьеле 1967-йисуз дагъдай ­куьчарай ЦIийи Усуррин хуьрни акат­зава. Мегьарамдхуьруьн районда бине­ламиш хьанвай адахъ къени хуьруьн статус — дережа авач. Гьа чIавалай инихъ я прописка, я зелёнка, я и хуьр аваданлами­шу­нин са прог­раммадик кутаз тежез, инсанар гьелек хьанва. Шумуд йис я, къе-пака лу­гьуз, месэла са­кIани гьял тийиз. Луткунар­ районда кьвед лагьай хуьр я. Школа хьана. Аялар а школадиз гьазурун патал бах­чани кIанда эхир. Эцигдай чилни ава. Тавакъу хьуй, къведай йисуз чи хуьре аялрин бахча эцигун республикадин программадик кутаз куьмек це.

Общественный палатадин председатель  Али  Исмаилова  Калукрин ва Цуругърин хуьрерани аялрин бахчайрин чарасузвал авайди къейдна ва райондин ЦРБ чи машгьур алим-офтальмолог, Дагъустанда илимрин докторвилин дережа къачур сад лагьай дишегьлидин — Къемер Палчаевадин тIварунихъ ягъун теклифна.

Ахпа Жамалдин Гьасанова са кьадар районэгьлияр чпин хсуси тIал-квал алай  месэлайрайни кьабулна, абурухъ дикъетдивди яб акална ва алакьдай куьмекар хиве кьуна.  “Гьар са карда теклиф жемятдин патай атана кIанда. Гражданвилин активвал къалурзавай куьн сагърай. Гила кьилинди: куьне инал къарагъарай вири месэлайрай зи тIварцIел, гьакI республикадин Гьукуматдиз герек тир вири чарар-цIарар рекье тур. Жувалай гьялиз алакь тийидай месэлаяр республикадин талукь идарайрин вилик эцигда”, — хиве кьуна ада.

Къейд ийин хьи, 27-июлдиз Жамалдин Гьасанов Докъузпара райондизни мугьман хьанвай. Чкадин администрацияда ада муниципалитетдин кьил Мегьамед Шамиловахъ галаз гуьруьш кьиле тухвана ва агьалийрин арзайрихъ яб акална.

Дашдемир Шерифалиев