Эхиримжи йикъара Дагъустандин жуьреба-жуьре министерствойрани ведомствойра цIийи инсанар къуллугърал тайинарнава. ИкI, РД-дин информациядин ва печатдин Агентстводин руководителдин сад лагьай заместителдин везифаяр Наида Мегьамедовадал ихтибарна. Виликдай ада РД-дин информациядин сиясатдин ва РД-дин Кьилин пресс-къуллугъдин управленида отделдин начальникдин заместитель яз кIвалахзавай.
РикIел хкин, июндин вацра РД-дин информациядин ва печатдин Агентстводин руководителдин заместитель яз виликдай региондин промышленностдин ва алишверишдин министерствода кIвалахай Аслудин Мегьамедов тайинарнай.
РД-дин экономикадин ва мулкар вилик тухунин министрдин везифаяр вахтуналди тамамарзавай Арсен Рустамова гила “Дагестанстатдиз” (Территориальный орган Федеральной службы госстатистики) регьбервал гузва. Министрдин везифаяр алатай йисан ноябрдин вацралай РД-дин экономикадин ва мулкарин рекьяй вилик финин министрдин заместитель яз кIвалахай Адильхан Агьмедован хиве тунва. Идан гьакъиндай Указ РД-дин Кьил Сергей Меликова акъудна.
Республикада карчивилин ва инвестицийрин рекьяй кардик квай Агентстводин руководителдин сад лагьай заместителдин чка Гьуьсейн Гьуьсейнова кьунва. Виликдай ада РД-дин эцигунрин, архитектурадин ва ЖКХ-дин министерствода управленидиз регьбервал гузвай.
Дербентдин музей-заповедникдани (къеледа) директор дегиш хьанва: везифаяр вахтуналди тамамарзавайди яз Велиюлла Фаталиев тайинарнава.
Виликан регьбер Виктор Чесноков вичин хушуналди кIвалахдилай элячIнава.
В.Фаталиев 1986-йисуз дидедиз хьана. РД-дин Халкьдин Собранидин депутат, миллетдал гьалтайла, азербайжанви я. Гьа са вахтунда ада Дербентдин музей-заповедникдин директордин умуми месэлайрай заместителдин везифаярни тамамарзавай.
Чи мухбир
