ОАЭ-дихъ Дагъустанда чпин такьатрихъ медицинадин чIехи центр эцигдай ниятар ава
1-августдиз Махачкъалада РД-дин Кьил Сергей Меликован регьбервилик кваз Дагъустан экономикадин рекьяй вилик тухунин Оперштабдин нубатдин заседание кьиле фена. Адан сергьятра аваз яшайишдин объектар эцигунихъ, республикадин бюджет кьилиз акъудунихъ, мектебар цIийикIа туькIуьр хъувунин кIвалахрихъ ва инвестицийрин проектрихъ галаз алакъалу месэлаяр веревирдна.
Сергей Меликова мукьвара Дагъустандиз ОАЭ-дин векил мугьман хьунин нетижаяр кьуна. Ада хабар гайивал, Дагъустанди къецепатан уьлкведихъ галаз промышленностдин, производстводин, туризмдин, эцигунрин хилериз талукь амадагвилин алакъаяр арадал гъанва. ОАЭ-дихъ Дагъустанда чпин такьатрихъ са шумуд муниципалитетдин агьалийриз къуллугъдай медицинадин чIехи центр эцигдай ниятарни ава.
РД-дин вице-премьер Муслим Телякавован гафарай малум хьайивал, алай вахтунда цIийи кIелунин йисаз республикадин мектебрин анжах 60 процент гьазур я. 13 муниципалитетда 1-сентябрдалди мектебра кьиле физвай ремонтдин кIвалахар куьтягьиз агакь тавун мумкин я. 16 муниципалитетда кIвалахар хъсан дережадаваз кьиле физва. Сергей Меликова и жигьетдай чешне къалурзавай районрин, шегьеррин кьилерин тIварарихъ разивилин келимаяр лагьана (абурун арада, мисал яз, Новолак район, Къизляр шегьер ава) ва веревирдзавай месэладин гьакъиндай гуьгъуьна амай муниципалитетра кIвалахар виликди тухун патал герек тир серенжемар кьабулна кIанзавайди къейдна.
Республикадин бюджетдин такьатар ишлемишунин жигьетдай авай гьаларикай вичин рахунра РД-дин финансрин министр Юнус Саадуева гегьеншдиз суьгьбетна. Якъин хьайивал, государстводин программаяр кьилиз акъудун патал чара авунвай такьатрикай менфят къачунин (освоение) кIвалах зайиф я. Ю.Саадуева къейд авурвал, такьатар ишлемишун шартI туш, абур харжна, кьилиз акъудзавай кIвалахрин ери хъсанди хьана кIанда.
Заседанидин нетижаяр кьадайла, Сергей Меликова РД-дин финансрин министрдал алай вацран эхирдалди республикадин бюджетдин такьатар ишлемишунин жигьетдай авай гьалар мад сеферда ахтармишун тапшурмишна. Ада гьакIни къейд авурвал, сентябрдин вацра бюджетдик дегишвилер кухтадайла, такьатар ишлемишиз тежезвай хилерай абур пул бес тежезвай министерствойринни ведомствойрин арада пайда.
Чи мухбир
