Чи ватанэгьлияр — гьар сана
Запасда авай полковник Алибуба Къазибеговахъ РФ-дин оборонадин министерстводи ганвай са жерге медалар ава
Кьасуман хва Алибуба Къазибегов 1970-йисан 5-февралдиз КцIар райондин Селягь-Уба хуьре дидедиз хьана. Мектеб акьалтIарайдалай кьулухъ ада Камышинский высший военный командный училищеда чирвилер къачун давамарна. Къейд ийин хьи, ина СССР-дин Яракьлу Къуватрин эцигунардай кьушунар патал офицерар гьазурзавай.
1991-йисуз чи ватанэгьлиди агалкьунралди училище куьтягьна. Кьисметди Байконурдиз акъудай А.Къазибегова ина хейлин йисара, инженер яз, жавабдар къуллугъар бегьемарна. 2006-йисалай ада “Байконур” космодромда “ЦЭНКИ” (Центр эксплуатации объектов наземной космической инфраструктуры) АО-дин филиалдин космосдин “Южный” центрадин директордин заместитель, кьилин инженер яз зегьмет чIугвазва.
Къейд ийин хьи, къуллугъдин рекье къалурнавай агалкьунар, намуслувал ва алакьунар фикирда кьуна, запасдавай полковникдиз РФ-дин оборонадин министерстводин, ракетайринни космосдин хилен карханайрин, жемиятдин тешкилатрин патай медалар, гьуьрметдин грамотаяр гана. Абурун арада, гьелбетда, “Байконур” космодромдин центрадин шабагьарни ава.
А.Къазибегова вичин уьмуьрдин юлдаш Муьгьуьббатахъ галаз санал чешнелу хизан арадал гъанва. Ватандивай яргъа яшамиш жезватIани, абуру хайи хуьрел, мукьвабурал кьил чIугвадай мумкинвал жагъурзава.
Чаз цавун бушлухриз лув гудай техника патал махсус дараматар эцигуник чIехи пай кутазвай ватанэгьлидихъ чандин сагъвални яргъи уьмуьр хьана кIанзава. Къуй чи цавар гьамиша экуьбур хьурай! “Байконур” космодромда лезги хва чIехи къуллугъдал хьунал чна дамахзава.
Бикеханум Алибегова
