Ахцегь райондин дагълух хуьрерикай сад Ушурар (Усурар) я. Ушур дереда чубарукдин муг хьиз авай и хуьр къе, гьайиф хьи, баябан хьанва. Ина гурлу уьмуьр кьиле фейи девирарни хьана. Агьалияр хуьруьн майишатдал машгъул тир. Ушурар тIебиатдин гуьзел чкайралди, бажарагълу, чIехи агалкьунар къазанмишнавай ксаралдини машгьур я. Къе Луткуна вичин сур-кIвал чIехи зияратдиз элкъвенвай Вагъуф бубани ушурви я. Яру партизанар Агьмед Агьмедов, Велихан Алиханов, инкъилабчи, Дагъустандин тIуьнрин-хъунрин рекьяй нарком Бекир Бекиров, философиядин илимрин доктор, ВОВ-дин иштиракчи Молла Вагьабов, алимар Нариман Вагьабов, Зайнаб Вагьабова, Имам Асланов, Салман Асланов, ТIелиб Апаев, военный духтур Лукьман Асланов, РД-дин Халкьдин Собранидин депутат хьайи Мирзехан Алиханов, карчи ва политик Девлетхан Алиханов ушурвияр я.
1926-йисуз дагъдин хуьре кьве классдин школа ачухна. Ватандин ЧIехи дяведин йисара 59 кас фронтдиз фена.
Алатай асирдин 60-йисара арадал атай залзаладилай кьулухъ, 1968-йисуз, федеральный программадай Усуррин хуьр Мегьарамдхуьруьн райондин Советский ва ЦIийи Гъепцегьрин хуьрерин арада авай чилерал куьчарна.
Алай вахтунда аниз са шумуд хуьряй вишералди агьалияр куьч хьанва.
1970-йисуз хуьруьз электрикдин эквер, 1989-йисуз яд, 1999-йисуз тIебии газ гъана.
И мукьвара Ахцегь райондин ЦIийи Усуррин хуьре кьве юбилейдиз талукь шад мярекатар кьиле фена. Хуьр арандиз куьч хьана ва цIийи хуьре школа кардик акатна 50 йис тамам хьанва.
Школадин директор Ф. Балабегова агьалияр тебрикна, цIийи хуьруьн школадин ва дагъда авай бубайрин хуьре мектеб кардик акатай вахтарикай суьгьбетна. Ахпа ада тафаватлу хьайи ученикрив ва муаллимрив грамотаяр вахкана.
Тебрикдин келимаяр Луткунрин хуьруьн администрациядин кьил А. Рагьимовани лагьана.
Инал муаллимар-ветеранар Г.Кьасумов, К.Гуьламетова, цIийи чкадал сифте куьч хьайи агьали Н.Султанов, пенсионер Г.Букаров, райсобранидин депутат Р.Насиров ва масабур рахана.
Школада кIелзавай аялри, кьилди къачуртIа, К.Нурагьмедовади, С.Самедовади, Х.Букаровади, Н.Балабеговади, Т.Самедовади, Р.Нурагьмедова, Ж.Букаровади ва масабуру манияр лагьана, кьуьлерна. “Звёздный Дагестан” дестеди концерт гана, пагьливанри симинал чпин устадвал къалурна.
Дагъви Шериф
