Чун вичикай рахазвай кас Ватандин ЧIехи дяведа танкарин ротадин командир тир. Яру Пайдах, Ватандин дяведин 1-дережадин кьве орденриз ва са кьадар медалриз лайихлу хьайи капитан, дяведилай гуьгъуьниз КцIарин мектебда военный тарсар гайи ветеран Байрамов Байрам Къазагьмедович ялцугъви тир.
Байрам 1920-йисан 1-январдиз Ахцегь райондин Ялцугърин хуьре чатухъан Къазагьмедан хизанда дидедиз хьана. И хизанда итимар къизилдин гъилер авай ракьун устIарар яз машгьур тир. Къазагьмеда ва Къафара, кьве стхади, туькIуьрнавай алатар исятда Советский хуьруьн музейда ава.
Кьисметди абур КцIар шегьердиз акъудна. Ина юкьван школа акьалтIарайла, Байрам Советрин Армиядин жергейриз тухвана. 1941-йисуз, Германияди чал вегьейла, ада РагъакIидай патан Украина, Белоруссия хуьзвай женгера иштиракна. 1941-йисан хъуьтIуьз Москвадин кIаник хьайи къизгъин ягъунра дурумлувал къалурна. 1942-йисуз Ульяновскдин М.И.Калининан тIварунихъ галай танкарин училищедик экечIна. Гатун эхирдай Сталинграддин фронтдиз рекье туна. 1943-йисан гатуз ада Курский къекъуьндал дирибашвал къалурна. Прохоровкадин ягъунрай чан аламаз ахкъатна. Воронежский фронтдик кваз Лебедин, Харьков шегьерар азад хъувуна.
Киев азад хъийидайла, 1943-йисан 6-ноябрдиз Байрам авай танкунин экипаж сад лагьайди яз гьахьна. И игитвиляй “Яру пайдах” орден гана.
Курсунь-Шевченкодин женгинай Кишинев, Яссы азад авурла адаз Ватандин дяведин 1-дережадин орден гана.
Румыния азад авурдалай кьулухъ Байрамова къуллугъзавай гвардиядин танкарин 6-армия Венгрия азад авун патал женгерик экечIна. Ина адал залан хер хьана. 1945-йисан январдиз сад лагьай группадин инвалид яз хтана.
Б.Байрамова КцIар шегьердин школа-интернатда ва юкьван школада тарсар гана. Вичин асул кIвалахдихъ галаз сад хьиз ада бубайрилай ирс яз атанвай устIарвални гадарнач. Азербайжандин милли телевидениди Байрам бубадин уьмуьрдикай, женгинин рекьикай, устIарвилин яратмишунрикай фильм туькIуьрна.
Байрам бубадикай, адахъ галаз фронтра женгера иштиракай аскеррикай гзаф ктабар кхьенва.
Байрам Къазагьмедович 2007-йисан 22-декабрдиз рагьметдиз фена. Адаз 6 велед, 11 хтул, 10 птул ава. Байрам бубади баркаллу уьмуьр кечирмишна.
Сулейман Пашаев
