Чи уьлкведал илитIнавай къадагъайрин шартIара СтIал Сулейманан райондин хуьруьн майишатдин карханайри, лежбервилинни фермервилин майишатри ва арендаторри дурумлу экономика арадал гъун патал намуслудаказ зегьмет чIугвазва. Гатун и йикъара абуру агакьнавай бегьер вахтунда ва пучвилер авачиз кIватI хъувунал вири къуватар желбнава.
Алай йисуз районда 65 гектарда къарпузар ва гатун халияр цанва. Салара хъсан бегьер дигмиш хьанва.
Райондин хуьруьн майишатдин ва суьрсетдин управленидин начальник Къазиагьмед Къазиагьмедовахъ галаз санал чун ДаркIуш-Къазмайрал арендатор Надир Къадимован (шикилда) халийрин салаз фена. Ада 10 гектарда къарпузар цанва. Абур кIватI хъувунин ва муьштерийрал агакьарунин кIвалахарни тешкиллувал ва еришар аваз кьиле физва.
— Алай йисуз гьар са гадай 55-60 тонн къарпузар хьун гуьзлемишзава, — лугьузва Надир Къадимова. — АтIай къарпузар чна Дербентда, Кьасумхуьрел, ЦIийи Макьарал ва маса чкайра маса гузва. Кьасумхуьрел тешкилай хуьруьн майишатдин мекердани за и йикъара маса гана. Салаз къвез, къарпузар маса къачуна, тухузвай муьштерийрин кьадарни тIамил туш.
Малум хьайивал, Н.Къадимова къарпузар ва гатун халияр гьасилиз 6 лагьай йис я. И рекьяй адахъ хъсан тежриба ава.
— Райондин мулкунал гьасилзавай къарпузар ва гатун халияр масанрай гъизвайбуралай неинки чпин акунралди, гьакI дадуналди, экологиядин жигьетдай михьивилелдини тафаватлу я, — лугьузва Къ.Къазиагьмедова.
Районда къарпузар ва гатун халияр кIватI хъувунин кIвалахар давам жезва.
Хазран Кьасумов
