Июндин сифте кьиляй Москвада Россиядин “Знание” обществоди тешкилнавай Лекторрин Лигадин чIехи конкурсдин II сезондин гъалибчийрив шагьабар вахкузвай мярекат кьиле фена. Ана Россиядин 42 шегьерда кьиле фейи конкурсра финалриз акъатай 50 гъалибчиди иштиракна. Хъсанбурукай лап хъсанбур 25 шегьерда яшамиш жезвай агьалияр хьана. Мярекатдал РФ-дин Президентдин администрациядин руководителдин сад лагьай заместитель С.Кириенко рахана. Ада конкурсдин финалдиз акъатнавай иштиракчийриз агалкьун мубаракна. Къейд авурвал, II сезон гзаф конкуренция авай зурбади хьана. Эгер I сезонда 2500 касди иштиракнайтIа, II сезонда 5 агъзур касди иштиракна.
Шад жедай кар ам я хьи, вичин ери-бине СтIал Сулейманан райондин Агъа СтIал-Къазмайрилай тир медицинадин илимрин доктор, профессор Къафаров Эдгар Сабировичакайни и конкурсдин гъалибчи хьана. Ам 1977-йисуз Къазахстан Республикадин ЦIийи Уьзенда дидедиз хьана. Агъа СтIал-Къазмайрин юкьван школа акьалтIарна, 1994-йисуз Астрахандин госмедакадемиядин лечебный факультетдиз гьахьна. 2000-йисуз анаг хъсан чирвилер аваз акьалтIарна, гьа и академиядин инсандин анатомиядиз талукь кафедрадин аспирантурада кIелун давамарна. 14 йисуз Эдгар Сабировича медицинадин академиядин анатомиядин кафедрада муаллимвиле кIвалахна. 2004-йисуз “Вариантная анатомия почечных артерий и ее ветвей” темадай (илимдин руководитель — профессор Р.И.Асфандияров) кандидатвилин диссертация хвена. 2014-йисан февралдиз -медицинадин илимда къазанмишнавай агалкьунриз килигна, Чечен Республикадин медицинадин институтдин руководстводи адаз кIвалахиз Грозный шегьердиз теклифзава. Гьа и йисан октябрдин вацра ада “Структурные преобразования венозных сосудов почек человека в зрелом, пожилом и старческом возрастах” темадай (илимдин консультантар — профессорар — Р.И.Асфандияров ва Л.А.Удочкина) докторвилин диссертация хвена. Алай вахтунда ада Чечнядин госуниверситетдин медицинадин институтда “Нормальная и топографическая анатомия с курсом оперативной хирургии” кафедрадиз регьбервал гузва.
Чирвилер, тежриба, меслятар гзаф инсанрив агакьарун патал Эдгар Сабировичахъ YouTub каналда вичин кьилдин “Эдгар Кафаров” канал, 120 агъзур подписчик ава. Ам YouTub видеохостингдин гимишдин кнопкадин сагьиб ( ихьтин тIварцIиз 100 агъзур подписчик авайбур лайихлу жезва) я. Алимдин каналда инсандин анатомиядиз талукь вини дережадин манадин, медвузра кIелзавай студентривай ва масабурувайни чпин чирвилерин дережа хкажиз ва менфят къачуз жедай 60 видеоролик ава. Абуруз дуьньядин 42 уьлкведин студентарни духтурар килигзава. Агъзурралди инсанри (медицинадихъ галаз алакъа авайбуруни, алакъа авачирбуруни) адан тIварцIихъ хуш келимаяр кхьенва, адан пешекарвал, инсанвал къейдзава.
Чечен Республикадин здравоохраненидин министр Идрис Байсултанова Россиядин Федерациядин медицина вилик тухуник аквадай хьтин пай кутунай алимдиз еке къимет гана. Ада къейд авурвал, Россияда инсандин анатомиядай 3D-моделированидин жуьреда докторвилин диссертация хвенвай сад лагьай алим чи ватанэгьли я.
Эдгар Къафаров къени хизандин кьилни я. Адан уьмуьрдин юлдаш Ханум Загьировнади (ам Мегьарамдхуьряй я) Чечнядин госуниверситетда муаллим яз кIвалахзава. Абуру пуд хциз тербия гузва, пудани школада хъсан къиметар аваз кIелзава.
Къуй чи ватанэгьлидихъ вири рекьерай мадни еке агалкьунар хьурай!
Къагьриман Ибрагьимов
