Хуьруьн майишатдин амай хилер хьиз, эхиримжи йисара СтIал Сулейманан районда магьсулдарвални виликди физва. Районда хуьруьн майишатдин карханайри, лежбервилинни фермервилин майишатри ва арендаторри кIватI хъийизвай техилдин кьадар йисалай-суз артух жезва. ИкI, шаз районда 6563 тонн техил кIватI хъувуна. Им вилик йисара кIватI хъувурдалай гзаф я.
Гад магьсулдарар патални жавабдар ва къизгъин вахт я, абурун вилик агакьнавай къуьлуьн ва мухан бегьер вахтунда ва пучвилер авачиз кIватI хъувунин везифа акъвазнава.
— Районда гад агудунив виликамаз туькIуьрнавай план-графикдин бинедаллаз, гьазурвал аваз эгечIнава, — лугьузва райондин хуьруьн майишатдин ва суьрсетдин управленидин начальник Къ. Къазиагьмедова. — ИкI, районда векьер кIватI хъувун эхирдиз къвезва. Гила вилик акъвазнавай важиблу месэла гад кIватI хъувунинди я. И кIвалах районда 20-22 йикъан къене акьалтIарун пландик кутунва.
Алай йисан бегьер патал районда зулухъай 853 гектарда мух ва къуьл цанай. Агротехникадин серенжемар галай-галайвал кьиле тухунин нетижада техилдин бегьерди рикIерик шадвал кутазва.
Райондин карханайрихъ 170 гектар гатфарин къуьлуьн никIерни ава.
Санлай къачурла, алай йисуз районда 1023 гектардай гад кIватI хъийида. Виликамаз кьунвай гьисабралди, гьар са гектардай 22-23 центнер техил вахчуда. Яд гузвай никIерин гектардин бегьерлувал 25-26 центнердиз барабар хьун гуьзлемишзава.
Гад агудунив районда сифтебурукай яз “Зардиян” чкадин хуьруьн майишатдин карханаяр ва арендаторар эгечIнава. План-графикдин бинедаллаз районда гад агудунин кIвалахар дагъдин зонадин “Кьелякь” участокда акьалтIарда.
Комбайнийрин гуьгъуьналлаз никIериз пресс-подборщикар галай тракторар экъечIнава, абуру самун алаф туьквера кьазва.
Кьилди къачуртIа, “Зардиян” ООО-да мух язава. Карханадин кьилин агроном Къурбан Магьмудова лагьайвал, юкьван гьисабдалди гьар са гектардай 29 центнер техил вахчузва.
Районда гад агудунин кIвалахар йикъалай-къуз йигин жезва.
Къизилдин ранг акьалтнавай никIерай гад кIватI хъийизвай магьсулдаррихъ элкъвена, лугьуз кIанзава: гад бегьерлуди, берекатлуди хьурай!
Хазран Кьасумов
