Кьурагь райондин Моллакент хуьруьн культурадин кIвалин художественный руководитель Салбина Тагъиева заз сифте яз Кьурагьа дишегьлийрин 8-мартдин сувариз тешкилнавай мярекатдик акуна. Ам са шумуд сеферда сегьнедиз экъечIна ва ада гьевесдивди маниярни лагьана. Адал суварин сегьнедихъ галаз кьадай партални алай.

Са акьван вахт алатнач, Салбина заз Ахцегьа акуна — Шарвилидин суварик. Кьурагь райондин майдандал манияр лугьуз, кьуьлериз, абур гъизвайди Салбина тир. Тамашачийри адаз капарни язавай, мадни манияр лугьун тIалабзавай.

Нубатдин сеферда за Салбина Та­гъиевадин манийрихъ Бугъдатепеда Кьуьчхуьр Саидан 250 йисан юбилейдиз талукьарнавай мярекатда яб акална. Ина ада ашукь Каирахъ галаз санал мани тамамарна.  Юбилейдиз атанвай вишералди инсанри манидардин сесиниз, манийриз гурлу капар ягъуналди къимет гана.

Зун Интернетдайни Тагъиевадин манияр жагъуриз алахъна. Килигай­тIа, и жегьил дишегьлиди, вичин къуллугъдин везифаярни кьилиз акъудиз, Дербентда, Белижда, Мегьарамдхуьре, Кьасумхуьрел музыкадин устадри, чкадин телеканалри тешкилзавай музыкадин, искусстводин межлисра иштиракзава, гьар сеферда цIийи манияр лугьузва. Ада чпин хуьруьн клубда тешкилай Яран суварин мярекатни жемятди хушвилелди кьабулна.

И мукьвара Салбина Та­гъи­евади Ма­хачкъаладин “777” ресторанда “Дуста­рин юкьва” тIвар алаз межлис тешкил­навай.

Жегьил дишегьлидин бажарагъдал, манийрал, сесинал рикI алайбурун вилик гьакI Билал Эскендаров, Мика Рамазанова, Аминат Алиева, Рамик Рамазанов, Суфиомар, ашукь Каир экъечIна. Салбинади лагьай гьар са мани гурлу капар ягъуналди ва цуьк­вер гуналди кьабулзавай. Ада ашукьдихъ галаз тамамарай “Вун — ашукь, зун — манидар” ва “Муьгьуьббатдиз яшар чидач” манияр яб акалзавайбуруз мадни хуш хьана.

Дагъустандин культурадин колледжда вичин чирвилер артухарзавай С.Та­гъиевади искусстводин милли сегь­­неда лайихлу чка кьадайдал шак алач.

Эмма Омарова