Дагъустан надир  ва аламатдин республика я. ТIебиатдин ажайиб шартIари и макан  акур гьар са кас гьейранарзава. Дагъустандин тIебиат — гьуьл, шир­ширдин ван алаз авахьзавай вацIар, чарчарар, вилер шадардай гуьзел чуьллер ва къумлух чилер, кьакьан, художникди чIугур хьтин дагълар, дегь заманайрилай инихъ авай архитектурадин эцигунар — садра акурла, рикIе­лай фидач.

Идалайни гъейри, Дагъустан  виридалайни гзаф миллетар са гъвечIи чкада яшамиш жезвай тек са республика я. Ина 50-далай гзаф миллетдин векилар  дуствилелди  яшамиш жезва.

Республикадин итижлу жедай ва рикIел аламукьдай чкайрикай сад  Дербертдин Нарын-къеле, Россиядин чилел алай къадим заманайрин дараматрикай сад я. Бязи делилралди, къеле чи эрадал къведалди 3-асирда,  яни 5 агъзур йис вилик эцигнава.

Къеледа  гьамамар, яд хуьдай  гьамбарханаяр, цIуз икрамзавайбуру ибадатзавай чкаяр,  мискIин, килиса ва чилин кIаник квай дустагъхана (зиндан) ава. Къеледай гуьзел акунар авай Дербент аквазва.

Дагъустанда машгьур чкайрикай сад —  такабурлу Шалбуз дагъ ава. Адахъ галаз хейлин кьисаяр алакъалу я. Заз чиз, вилералди такунмаз, Шалбуз дагъдин гьайбат гьисс ийиз жедач — ам гьар са касдиз акуна кIанда.

Ибурал алава яз,  Дагъустанда Самурдин гуьзел, надир там ава. Россиядин чилел алай сармашухдиз ухшар набататрин тек са там. Маса уьлквейриз лув гузвай ва кьуьд Да­гъустанда акъудзавай жуьрейрин къушари ина  рикI алаз мукар кутазва. Абурун чIехи пай Яру ктабда гьатнава.

Июлдин юкьварилай сентябрдалди Самурдин тама цуьк акъуднавай лотосдиз килигиз жеда. Михьи це балугърин лужар аквада­. Гатун эхирра ва зулухъ кIерецар, тамун емишар дадмишиз жеда. Самурдин тамуз фин Кьиблепатан Дагъустандин гуьзел тIебиат­дихъ галаз таниш жедай лап хъсан мумкинвал я.

Патимат Къурбанова, студентка