Шикилдай аквазвай гьашаратдин тIвар трилобит я. И пепедин жинсер 1500 кьван аваз гьисабзава. Абурукай кьуд жуьре Россиядани яшамиш жезва. Трилобит пепеяр гзафни-гзаф Кьиблепатанни рагъэкъечIдай патан Азияда, Индияда ва Индонезияда гьалтда. Трилобитрин рикI алай чка тропикрин тамар я.

Шурван пепеяр, мичIи чкада экв гудай пепеяр трилобитдин «багърийрик» акатзава. И пепейрин тIуьн цуькверин, тарарин мижейрикай, къарникъузрикай ва куьлуь гьашаратрикай ибарат я. КтIизвай тарарикайни абуру миже хъвада.

Луварин къерехар къати яру рангунинбур жеда. И рангуни пепе зегьерлуди тирдан гьакъиндай тагькимарзава. Алимри тестикьарнавайвал, трилобитдин ивидик зегьерламиш жедай такьатар ква. И кар себеб яз, и пепейрихъ душманарни авач.

Трилобитрин кIвачер къуватлубур ва яргъибур я. Ам 7-8 сантиметрдин яргъивал алай пепе я. Лувар анжах эркек трилобитрихъ ава.

Винел патан акунар такIан жедайбур ва къурху кутадайбур ятIани, инсан патал и пепейрикай хаталувал авач. Гьакъикъатда и пепеяр ислягьбур, мумкин тир душманрихъ-гьашаратрихъ галаз женг чIугунал рикI алачирбур я.

К.Ферзалиев