2022-йисуз I Петр дидедиз хьайидалай инихъ 350, Урусатдин дявединни гьуьлерин флотдин тарих патал еке метлеб авай вакъиадин — Персиядин походдин (1722-1723-йисар) 300 йис тамам жезва.
И вакъиайрин сергьятра аваз, Дербентдин администрациядин образованидин управлениди, “Гьажи Давудан тIварунихъ галай руьгьдинни марифатдин центр” АНО-ди ва “Женгинин баркаллувилин” музейди шегьердин къадим къеледин мулкарал “Кавказ до и после Персидского похода Петра I 1722 года” темадай 10-классра кIелзавай аялрин арада тухвай конкурсдин гъалибчийрихъ галаз тарихдай сиягьатдин къайдада ачух тарс кьиле тухвана.
Винидихъ къейднавай онлайн-къайдада кьиле фейи конкурсда (ахтармишунрин тестра) Кьиблепатан Дагъустандин районрин, Дербент, Дагъустандин Огни шегьеррин мектебра кIелзавайбуру иштиракна. Абурун арадай хъсан чирвилер къалурай 50 касдиз Нарын-къеледа кьиле тухвай ачух тарсуниз теклифна.
Мярекатдин иштиракчийрин вилик Дербентдин педколледждин тарихдин муаллим Жафар Давудова “Национально-освободительная борьба горцев XVIII века под предводительством Хаджи Давуда и образование государства Ширван в составе Османской империи”, шегьердин музей-заповедникдин илимдинни ахтармишунрин сектордин заведующий Назир Эминова “Дербент — северный форпост Кавказской Албании”, илимдин къуллугъчи Вели Юсуфова “Дербент в составе Арабского Халифата”, “Дербентский Эмират”, 1-нумрадин СОШ-дин завуч Мира Керимовади “Персидский поход Петра I в 1722 г.” темайрай докладар авуна.
Абуру авур ихтилатрай аялриз Дербент арадал атай лап къадим девирриз талукь тир тарихдин вакъиайрикай, шегьер сасанидрин пачагьри, хазаррин каганатди, арабрин халифатди идара авур йисарикай алава малуматар чир хьана.
Къейд ийин хьи, мярекатдин сергьятра аваз тешкилатчийри конкурсда 1, 2, 3-чкаяр кьурбурни тебрикна, абурухъ мадни еке агалкьунар хьун алхишна.
ГьакIни ачух тарсунин иштиракчийрин, винидихъ тIварар кьур идарайрин векилрин къарардалди Дербентдин музей-заповедникда “Тарихдал рикI алай жаванрин клуб” тешкилна. Анин регьбервиле шегьердин 17-нумрадин СОШ-дин тарихдин муаллим Гуьлара Гьамидова хкяна.
Къагьриман Ибрагьимов
