Тарихчи Ханжан Къурбановаз Туьркияда авай лезгийрикай фильм гьазуриз кIанзава
Тарихдай малум тирвал, Туьркияда лезгияр Гьажи Давудан девиррилай яшамиш жезва. Абур Ватандай къецепатан уьлкведиз Кавказдин дяведин ва 1877-йисан бунтарилай кьулухъ куьч хьана.
Туьркияда авай Дагъустандин диаспорадин векилрикай, абурун яшайишдикай, хайи чиливай яргъа дагъвийри милли чIал, адетар хуьзвай гьаларикай алимар тир А.Гуьлмегьамедова, А.Мегьамеддадаева, М.Къурбанова илимдин макъалаяр кхьена. Ахтармишунар жемиятдин тешкилатчийри тухвана, мисал яз, “Ватан” ассоциацияди. Амма къенин йикъалди Туьркияда яшамиш жезвай лезгийрикай документрин бинедаллаз пешекарвилелди гьазурнавай видео-очерк авач.
Алай вахтунда лезгияр Балакесир вилаятдин Кирне, Дуьмберез, Измир вилаятдин Дагъустан хуьрера, Бурса, Балакесир, Измир, Стамбул ва маса шегьерра яшамиш жезва. Гьелбетда, абурун арада яшайишдин жуьреба-жуьре хилерай агалкьунар авай алимар, карчияр, духтурар ва маса пешекарар ава. Амма абурукай лезги халкьдин гегьенш къатариз ерли хабар авач. Ихьтин шартIара тарихдин тамам са къат хъендик кумукьзава.
Машгьур журналист, тарихчи ва политолог Ханжан Къурбанов кьилевай яратмишдайбурун са дестеди алай вахтунда Туьркияда авай лезгийрикай документальный фильм туькIуьруниз гьазурвилер аквазва. Амма ихьтин проект кьилиз акъудун патал сифте нубатда пулдин такьатар герек я.
“Лезги газетдин” редакцияди ашкъи ва мумкинвилер авай ватанэгьлийриз и проектдик пай кутуниз эвер гузва. Вири суалрин патахъай Ханжан Къурбанован электронный почтадиз (xanjan@yandex.ru), соцсетра авай адан аккаунтриз кхьиз жеда.
Агьмед Магьмудов
