Гъилевай йис лезгийрин милли литературадин векилрин юбилейралди девлетлу я. Абурукай сад шаир Сажидин Саидгьасанован 85 йис тамам хьунинди я.
И кардихъ галаз алакъалу яз Милли библиотекадин край чирдай отделди юбилярдин уьмуьрдинни яратмишунрин рекьериз бахшнавай девлетлу выставка ачухнава.
Сажидин Саидгьасановакай ван тахьай лезги Дагъустанда бажагьат гьалтда, я ам тефей лезги хуьрни бажагьат ама. Шаирдин эсерар гьеле алатай асирдин 70-йисара чапдай акъатзавай. “Чешме” тIвар алай кIватIалди сифте яз кIелзавайбур адан “Вун накь вучиз атаначир?”, “Темпелдин хиялар” шииррихъ — манийрихъ галаз танишарна (1970-йис). А чIавалай инихъ шаирди кIелзавайбуруз 11 ктаб, иллаки аялар патал кхьенвай гуьзел эсерар багъишна. “НуькI-хала” пьеса лезги театрди сегьнеламишна.
Автордин хейлин шиирар урус ва маса чIалариз таржума авуна, “Правда” газетдиз, “Крокодил”, “КIватIи-кIватIаш” журналриз акъатна.
Сажидина чи вилик прозадин эсерарни гъанва. “Ашукь Уьзден”, “Зи Сулейман” гьабурукай я. Ада халкьдин хейлин мисалар, дурумлу ибараяр, хайи хуьруьн тарихдай делилар, маса материалар кIватIна, несилрив ахгакьарна. Гьавиляй адаз “РД-дин культурадин лайихлу работник” ва “РД-дин жегьилрин лайихлу насигьатчи” лагьай гьуьрметдин тIварарни гана.
И вири материалар гила ачухнавай выставкада ава. Абурукай хайи чIалал, литературадал, тарихдал ашукь гьар садавай менфят къачуз жеда.
Чна, Милли библиотекадин къуллугъчийри, гьакI ктабрал рикI алай вишералди кIелзавайбуру юбиляр рикIин сидкьидай тебрикзава. Сагърай, мадни чIехи агалкьунар хьурай вахъ, Сажидин муаллим, лугьузва чна.
Секинат Мусаева, РД-дин милли библиотекадин кьилин библиотекарь
